Për shumë prej jush mund të duket e pabesueshme ajo se çfarë ka ndodhur gjatë natës së djeshme në fshatin Drenovë të Korçë.
Hajdutët ja kanë aritur të vrasin e therrin dy bagëtitë brenda stallës duke lënë si gjurmë vetëm lëkurët dhe organet e brendëshme të dy lopëve. Hajdutët kanē shfrytëzuar vendndodhjen e stallës në dalje të fshatit, diku pranë ish-repartit ushtarak të Drevovës.
Dy bagëtitë ishin në pronësi të banorit Pirro Nole.
Ngjarjen e konfirmoi kryeplaku i fshatit si një rast të dhunimit të pronës private por që përbën shqetësim të vazhdueshëm në Drenovë.
“Vjedhjet janë kthyer në një problematikë kryesore, sidomos nga fakti se keqbërësit nuk zbulohen. Në fakt, prej disa muajsh nuk kanë ndodhur vjedhje, por u rikthyen me këtë rast të çuditshëm të grabitjes të bagëtive duke i therrur e paketuar që në stallë”-thotë kryeplaku i Drenovës.
Ai shton se e ka pësuar vetë me vjedhjen tre herë të dyqanit në qendër të fshatit. Banorët tregojnë se janë vjedhur sipërfaqe me lajthi dhe vreshta kohët e fundit. Krahas dëmit ekonomik, ata ndihen të pasigurtë për jetën nën furrinë e vjedhjeve dhe rrezikut nga kjo dukuri e pa ndalshme dhe e pa ndëshkuar hajdutërie.
