Ditmir Bushati, ish-ministër i Jashtëm, i kërkoi Partisë Socialiste që të kërkonte falje lidhur me kandidimin e Valdrin Pjetrit si kryebashkiak i Shkodrës.
Pjetri doli subjekt i ligjit të dekriminalizimit, ndërsa Bushati apeloi që PS të njohë përgjegjësinë politike për këtë rast dhe ti kërkojë falje votuesve.
Lidhur me këtë apel të Bushatit, ka reaguar mbrëmjen e sotme Kryeministri Edi Rama, sipas të cilit përgjegjësia është individuale dhe se partia nuk ka pse të kërkojë ndjesë.
Në emisionin Real Story, Rama tha se propozimi për Pjetrin ka ardhur nga drejtuesi politik i qarkut dhe se ish-ministri Bushati ka idetë e tija dhe për këtë nuk ka asnjë problem.
“E tha, mirë bëri që e tha. Është drejtuesi politik ai që e ka propozuar atë kandidat dhe që nuk mund të fajësohet se kandidati gënjen. Që e ka një ide të vetën Bushati, s’ka asnjë problem. Është ide e tij. Pse duhet të kërkoj ndjesë partia këtu se një kandidat gënjehu?? Jo. Një anëtar të një familje me baba dhe mama shembullore, del dru i shtrembër. Por s’mban përgjegjësi familja”, tha Rama.
Lidhur me propozimin e Valdrin Pjetrit, Ditmir Bushati ka thënë në një intervistë për DW pak kohë më parë se Asambleja e Partisë socialiste propozoi 3 kandidatë të tjerë për Shkodrën dhe se “dihet nga erdhi” kandidatura e Pjetrit.
