Në 30 vjetorin e rënies së murit të Berlinit, Ambasada gjermane në Tiranë, ka organizuar një ceremoni ku ka mbledhur përfaqësuesit më të lartë të politikës shqiptare.
Gjithsesi kjo festë nuk ka bërë bashkë Kryeministrin Edi Rama, Kreun e PD-së, Lulzim Basha dhe Presidentin, Ilir Meta, që kanë shmangur edhe shtrëngimet e duarve.
Meta ka zgjedhur të shtrëngojë duart me kreun e Kuvendit, Gramoz Ruçin dhe atë të grupit parlamentar socialist, Taulant Balla, ndërsa Rama dhe Basha janë takuar pothuajse me të gjithë të pranishmit, por jo me njëri-tjetrin.
Pak orë më pas nga kjo festë, Rama dhe Meta, nga dy studio të ndryshme televizive, kanë sulmuar dhe akuzuar njëri-tjetrin, duke konfirmuar publikisht përplasjen mes dy institucioneve kryesore në vend Presidencës dhe Qeverisë.
Ambasadori gjerman, Zingraf, i ri në postin diplomatik në Tiranë, nuk nguroi ti kujtonte krerëve të politikës kushtet e Gjermanisë për integrimin.
“Mbështetja jonë mund të jetë vetëm ndihmë, ndërkohë që përmirësimi kushteve të punës dhe jetesës duhet të vijë përfundimisht nga institucionet shqiptare. Qeveria federale dhe Bundestagu në Berlin i thanë po hapit të radhës së Shqipërisënë procesin e anëtarësimit në BE. Vazhdimi i reformave, sidomos në fushën e drejtësisë dhe administatën publike, lufta kundër korrupsionit dhe krimit të organizuar janë parakushte për këtë”, theksoi Zingraf.
Sipas tij, hapja e negociatave dhe plotësimi i kushteve të vendosura nga Bundestagu janë baza për investitorët e huaj, përfshirë ata gjermanë.
“Gjermanët vazhdojnë të jenë të interesuar për Shqipërinë, por klima ende nuk i ka bindur për të bërë investime të mëdha”, shtoi ai.
