Të shtëna me armë zjarri janë shënuar në Lezhë. Nuk raportohet për persona të lënduar. Policia njoftoi këtë të mërkurë arrestimin e dy personave dhe procedimin e dy të tjerëve lidhur me ngjarjen.
“Bazuar në informacione policore se një shtetas kryente manovra të rrezikshme me mjetin e tij dhe qëllonte në ajër me armë zjarri duke u konfliktuar për këtë shkak edhe nga disa persona të tjerë, është ndërhyrë në fshatin Pllanë ku janë arrestuar në flagrancë shtetasit (babë e bir) F.N. 52 vjeç, banues në Pllanë – Lezhë për veprën penale ‘Prodhim dhe mbajtje pa leje e armëve luftarake dhe municionit’. D.N. 21 vjeç, banues në Pllanë – Lezhë për veprat penale ‘Armëmbajtje pa leje’, ‘Moskallëzim krimi’, ‘Veprime që pengojnë zbulimin e së vërtetës’. Si dhe u proçeduan në gjendje të lirë shtetasit: E.N. 37 vjeç dhe B.B. vjeç 26 , banues në Pllanë – Lezhë për veprat penale ‘Dëmtime të tjera me dashje’, ‘Kanosja’”, njoftoi policia.
Sipa të njëtave burime, D.N. dyshohet se në fshatin Pllanë – Lezhë, ka kryer manovra të rrezikshme me mjetin e tij si dhe qëlluar në ajër me armë zjarri, duke kryer më pas veprime që pengojnë zbulimin e së vërtetës, ndër to edhe fshehja e armës së zjarrit e cila u gjet nga forcat policore dhe u sekuestrua në cilësinë e provës materiale. Në lidhje me këtë shkak, është konfliktuar gjithashtu edhe nga shtetasit B.B. dhe E.N.
Gjithashtu, edhe nga kontrolli i ushtruar në banesën e babait të tij, u gjet dhe sekuestrua në cilësinë e provës materiale një fitil zjarr përcjellës. Materialet procedurale iu referuan Prokurorisë pranë Gjykatës Shkallës Parë Lezhë për veprime të mëtejshme.
