Julian Sulo, 39 vjeç, është personi që iu sekuestruan 70.000 euro dhe një automjet me vlerë 100 000 euro që dyshohet se janë përfituar nga aktiviteti kriminal. Sulo është një emër i njohur për policinë.
Në kroniken e zezë, gjurma e fundit e emrit të tij shfaqet një vit më parë, kur Policia e Lushnjës dhe FNSH-ja e Fierit e vunë në pranga pasi nuk iu bind një urdhri të policisë për të ndaluar. 39-vjeçari, i njohur si “Juli i Pashakos”, u largua me vrap në rrugicat e qytetit, në lagjen “Gafur Muço”, pasi braktisi mjetin me të cilin lëvizte, por u kap nga policia. Nga makina e blinduar me të cilën lëvizte, ai hodhi armën “Grand Power” Q 100, që policia e sekuestroi bashkë me 15 fishekë.
Ai ka qenë një nga personat e shoqëruar si të dyshuar për masakrën në Lushnjë, ku u ekzekutuan Jurgen Hoxha dhe Zamir Latifi, miq të nipit të Aldo Bares, Laert Haxhiut. Sula u vetëdorëzua në polici pas vrasjes së dy të rinjve por u lirua më pas për mungesë provash.
Një tjetër ngjarje, ku ai shfaqet protagonist është ajo e gati tre viteve më parë, më 11 qershor 2016, kur Julian Sulo u plagos pas ndeshjes Shqipëri-Zvicër në një pikë bastesh, në lagjen “Skënder Libohova”. Lokali në fjalë ishte në pronësi të Arjan Aliços, i njohur ndryshe si “Arti i Braçes” një 53-vjeçar, i dënuar më parë për vrasje dhe që njihet si një nga ushtarët e Aldo Bares. Ai u qëllua me thikë rreth 20 herë dhe me leva aq sa u la si i vdekur buzë rruge dhe u shpëtua nga një kalimtar i rastit. Sula nuk përmendi kurrë emrin e ushtarit të Aldo Bares si autor, por Arjan Aliçko mori përsipër krimin dhe u dërgua në burg. Ndërkohë, në 29 janar 2018, viti banesa e Arjan Aliços në lagjen “18 tetori” të Lushnjës u qëllua me armë zjarri, por nuk pati persona të lënduar.
