Detaje të reja janë zbardhur nga vrasja e trefishtë në fshatin Xibër të Klosit. Mollë sherri mes dy vëllezërve dyshohet se ka qenë një gardh që ndante banesat e tyre, ndonëse kjo nuk është konfirmuar ende.
Burime nga grupi hetimor konformojnë se ka dyshime që vrasja të ketë ndodhur për çështje pronësie, ku vëllai ka qëlluar me breshëri plumbash vëllanë e tij, para derës së banesës së këtij të fundit .Menjëherë pas ngjarjes, pasi djali 17-vjeçar ka parë babanë e tij në tokë, ka ndërhyrë për t’i dhënë ndihmë, por është qëlluar edhe ai nga xhaxhai.
Ndërkohë, babë e bir janë nisur me urgjencë drejt spitalit, por për shkak se fshati ndodhej më shumë se një orë larg spitalit, ata nuk kanë mundur të mbijetojnë, duke ndërruar jetë.
Sapo autori i krimit ka marrë vesh lajmin tronditës, ka vrarë veten.
Një i afërm i familjeve tha se prej 6 vitesh, dy vëllezërit nuk flisnin me njeri-tjetrin, pas konfliktit për gardhin që ndajnë banesat e tyre.
“Rreth orës 14.24, në rrethana ende të paqarta, shtetasi Sali Dakuçi, 53 vjeç, ka vrarë me armë zjarri vëllanë, shtetasin Kujtim Dakuçi, 52 vjeç, dhe djalin e këtij të fundit, Flodet Dakuçin, 20 vjeç. Më pas, Sali Dakuçi ka vrarë veten. Grupi hetimor ka shkuar në vendngjarje dhe po punon për zbardhjen e plotë të ngjarjes”, njoftoi policia.
