36 të vdekur dhe 36 të plagosur është bilanci i një aksidenti të rëndë të regjistruar në lindje të Kinës, ku një kamion u përplas me një autobus. Autbosi kishte 69 pasagjerë, kur u përplas me kamionin e mallrave në autostradë, në afërsi të provincës Jiangsu.
Sipas autoriteteve vendase, hetimet e para dyshojnë se autobusit i është çarë njëra nga gomat, ajo në krahun e shoferit, duke bërë që mjeti të përplaset me kamionin. Për shkak të aksidentit, autostrada u bllokua për të paktën tetë orë, deri në përfundimin e operacionit të shpëtimit.
Aksidentet rrugore janë të shpeshta në Kinë, ku zbatimi i rregullave të qarkullimit shpesh nuk respektohet. Sipas autoriteteve kineze, vetëm në vitin 2015, në Kinë humbën jetën 58 mijë persona nga aksidentet rrugore.
Shkelja e rregullave të qarkullimit është shkaku i 90% të aksidenteve që ndodhin në këtë shtet, ku për pasojë humbin jetën mijëra persona çdo vit.
