Nga Boldnews.al
Kryebashkiaku i Tiranës Erion Veliaj ka marrë revansh, kërkon pushtet edhe më shumë nga sa e ka. U desh tërmeti që Veliaj të shkundte ministrin e Ramës, Blendi Klosin. Termeti në Tiranë ka dëmtuar rreth 600 banesa, disa prej të cilave duhen ndërtuar nga fillimi dhe të tjera kërkojnë rikonstruksion.
Mundësi e mirë për të bërë para me fatkeqësinë qytetare, por Lali Eri ka hasur në një problem të kahershëm. Për të dhënë një leje ndërtimi, më parë duhet marrë leje mjedisore, të cilën ligjërisht duhet ta japë inspektorati i mjedisit, i cili është në varësi të ministrisë së drejtuar nga Blendi Klosi.
Lali Eri i do të gjitha, nuk do të ndajë asgjë me askënd, madje edhe parqet publike, zonat e mbrojtura kërkon ti kthejë në një kantier të madh ndërtimi, me kulla, pallate dhe njësi shërbimi. Klientët i ka të gatshëm, një grup të vogël oligarkësh që mbajnë ndezuar makinat betoniere për çdo rast. Pas deklaratës së djeshme të kryebashkiakut Erion Veliaj, i cili thumboi ministrin dhe kërkoi hapur që Inspektoriatet e Mjedisit në të gjithë vendin të shkrihen, pasi janë struktura të korruptuara, dhe kjo kompetencë t’i kalojë bashkive, ka ardhur edhe një përgjigje nga Klosi.
“Ndryshimi i ligjit ka prishur shumë interesa, ka ndryshuar shumë rregulla. Është e vërtetë se vendosja e rregullit ka shkaktuar shumë probleme dhe ka prishur interesa. Por është e mirë që parqet që ka na falur zoti t’i mbrojmë. Vlerat e tyre janë shumë më të veçanta se dëshirat e një kryebashkiaku, sepse duke qenë e bukur është shumë e lakmueshme. Duhen aktivitete që nuk dëmtojnë agro-turizmin dhe natyrën”, u shpreh Blendi Klosi.
Ka ngjashmëri me një tufë hijenash që kanë kapur një copë të madhe mishi. Të gjithë hanë për disa kohë, por në fund dy prej tyre më së fundi kanë dalë nga “radhët” dhe duan jo më thelën e madhe, por të gjithë prenë. Lali Eri është më i avantazhueshëm, jo për shkak të forcës së “shqyrjes” dhe dhëmbëve të mprehtë, por ka mbrojtje, është forcuar.
Kryebashkiaku i Tiranës është fuqizuar aq shumë sa nuk po nguron të sulmojë edhe të tijët, qofshin ata edhe të përkëdhelurit e Ramës. Ai e konsideron veten në një hap me kryeministrin. Para, pushtet dhe media për propagandë. I ka të trija, madje edhe artistllëkun e zotëron për shfaqje televizive, si një aktor që prish mendjet e qytetarëve të thjesht, të cilët nën halucinacione i besojnë këtij “magjistari” dhe ngopen me lugën bosh që ofron në çdo “vaft lajmesh”.
Kaloi tërësisht pa vëmendje mediatike edhe një qëndrim i Veliajt, i cili kërkon që të shtrijë administrimin e tij, përtej hartës së Bashkisë Tiranë. Kërkon “hise” nga Kamza dhe Vora, sidomos në pjesën më vitale të saj ku ndodhen qindra biznese përgjatë atij aksi.
Kryebashkiaku është rrezik serioz, i pandalshëm, ku Klosi mbetet tërësisht i pafuqishëm para tij, po ashtu edhe ministrat e tjerë që kanë krijuar një lloj “autocensure”, duke heshtur para çdo batërdie që vjen nga Bashkia Tiranë. Lali gëzon mbështetjen e Ramës dhe ndoshta historia mund të përsëritet, ku gropa politike vetë kryeministrit mund ti thellohet pikërisht nga njeriu që e bëri Mjaftist, e ktehu në G 99-ësh, e rriti si ministër dhe i vari në qafë çelësin e Tiranës.
Nëse Valiaj merr çdo pushtet, përfshi edhe atë që të vendosë për çdo lejë ndërtimi, do e bënin të pathyeshëm jo nga një Klos që shëtit me lule në duar dhe qese me lëng për të vizituar turistët me urdhër të Ramës, por edhe nga vetë Rama, pushteti mbahet me para dhe ata janë në duart e oligarkisë që po i qëndrojnë brenda zyrës së Lalit të butë, i cili po merr hise më shumë, nga plaçka Shqipëri.
