Nga Boldnews.al
Drejtoria e Policisë së Shkodrës njofton se titullarët e saj kanë zhvilluar një takim të ngrohtë dhe miqësor me kolegët e tyre nga Ulqini i Malit të Zi.
Por, mesa duket, për të “ngrohur” bisedën, megjithëse ende nuk ka nisur i ftohti, kryepolici i Shkodrës, Niko Brahimaj ka gjetur “ilaçin e duhur”, gotën e Whiskey-t.
Në një njoftim të publikuar në profilin zyrtar në rrjetin Facebook për këtë takim, të zhvilluar në datën 25 Shtator 2019, Policia e Shkodrës ka publikuar edhe disa foto.
Duket se stafi i propagandës së Drejtorisë së Policisë së qytetit verior nuk është treguar i kujdesshëm. Në një seri fotosh që shoqërojnë njoftimin, dallohet lehtësisht se pjesa më e madhe e bashkëbiseduesve kanë para tyre gotat e Whiskey-t.
Ka një detaj që dëshmon se personat përgjegjës për realizimin e marrëdhënieve me publikun kanë tentuar të fshehin faktin se biseda e zyrtarëve të lartë policorë është bërë në prani të gotave të Whiskey-t.
Në njërën prej fotove është fshirë, me një punim të keq me photoshop, gota e alkoolit që gjendej para një prej personave në tavolinë.
Por, e njëjta foto, në variantin e pamodifikuar, gjendet gjithashtu në galerinë e fotografive të takimit, të publikuar në rrjetin social.
Përpjekja për të zhdukur gotën e Whiskey-t është realizuar vetëm në njërën prej fotove. Pasi, në disa të tjera, askush nuk është shqetësuar që të fshehë detajin e gotës, të paktën para drejtorit Niko Brahimaj.
Gjithësesi, biseda rreth gotave të alkoolit duket se nuk e ka zbeehur rëndësinë e takimit ndërkombëtar. Për Policinë e Shkodrës, biseda ka qenë konstruktive dhe takimi mes Brahimajt dhe Drejtorit të Policisë së Ulqinit, Arben Tagani u karakterizua nga shprehja e konsideratave të larta për njëri-tjetrin.
Qëllimi i takimit, gjithnjë sipas versionit zyrtar, ishte ishte shkëmbimi i informacionit me interes reciprok për individë apo grupe kriminale që kishin shtrirë veprimtarinë e tyre jashtë kufijve ndërshtetërorë në fushën e krimeve të rënda në përgjithësi dhe në fushën e krimit të organizuar në veçanti.
Ky qëllim duhet të jetë arritur që në nisje të takimit ndërmjet strukturave policore. Pasi, pas gotës së parë të Whiskey-t, në varësi të rezistencës së palëve, biseda mund të merrte trajta dhe forma të ndryshme.
