Nga Boldnews.al
Atij parlamenti me ide të vdekura, i mbushur me figura që përfaqësonin servilizmin, bindjen ndaj kryerilindasit dhe përunjësinë ndaj pushtetit, i mungonte një personazh atipik. Duhej një klloun më i madh se vetë kryekllouni dhe sot e kemi gjetur. Është deputeti Kujtim Gjuzi dhe çfarëdo të ndodhë në këtë vend ku qesharakja është serioze, Kujtimi na ka lënë diçka të madhe: pamjen e një pushteti që e ktheu shtetin në orgji batutash dhe klithje injorance, ku edhe korbi ngjan si pulëbardhë para tyre. Deputeti ka marrë hov.
Në një emision sportiv, Timi jonë, hapi fjalorin e pasur të çunave që përtypin fara dhe gjuajnë gjimnaziste duke iu drejtuar volejbollistes që mban edhe kurorë misi: Paske ballkone të rrezikshme? A mos ngjiti kjo batutë e huazuar prej intelektualëve të parlamentit? Silvana Bushati e mori me sportivitet, por u bë me izmin e Kujtimit zëvendëspresidente e Partisë Konservatore, që vetë ai e drejton. Eh Gjuz gjahtari, të ketë qëlluar në shenjë? Nuk ngjan aspak kështu, Bushati i preu hovin deputet Timit.
“Unë tropojane, nga Tropoja e Sali Berishës dhe Azem Hajdarit. Shqipëria me deputetë si ti dhe shokët e tu nuk bëhet kurrë. E keni kthyer Parlamentin ne cirk me kllouna”.
Këto ishin fjalët e misit që tregoi se nuk është objekt epshesh të të vetëshpallurve politikanë, që në një kohë tjetër do ishin publikisht të harruar, por Rilindja i ka ricikluar për të dhënë shfaqje si në kohën e estradave të Kooperativave të Bashkuara. Heshtje, deputet Timi me “çifte zbrazur” mbeti pa fjalë, jo se shquhet për fjalor të pasur, por shtangu. Ndodh që të denigrohesh në publik, të të bien edhe ata pak xullufe të mbetura maj çaçit të kokës, sepse ndër tëmtha brisku ia kishte ruajtur leshtë e kresë bashkë me atë pak tru të mbetur. Ndihmë kërkohet për të dalë nga kjo situatë, por Tim deputeti nuk është i vetëm, ka shokë mendjendritur që të nxjerrin nga situata. “Lym, jom m’hall t’modh, cca ti them”? E ndoshta aty i ka ardhur në ndihmë shoku Myslym që nga goja nxjerr ferra e murriza.
Timi i mirë me shokë shumë… E kur mblidhen në Parlament e gjithë njerëzia gati sa nuk shpërthen në dënese se ku jemi katandisur. Të vetmit që qeshin janë kolegët deputetë, ministreshat e Skënderbe Ramës. Edhe ata deputete që kanë ballkone të rrezikshme, por që nuk e kanë problem të lejojnë Rilindasit të shohin panoramën pranë “parajsës” së tyre.
