Një student shqiptar 20-vjeçar, është gjetur i pajete pranë një parkimi në Genova të Italisë, pasditen e djeshme. Sipas mediave italiane, ka qenë një grua që ka parë të riun në një pellg gjaku dhe ka dhëne alarmin, duke njoftuar policinë dhe ambulancën.
Kur kanë mbërritur forcat policore dhe ndihma e shpejtë, u konstatua se i riu kishte ndërruar jetë dhe kishte një plage të thelle në kokë.
Fillimisht policia dyshoi se bëhej fjalë për një vetëvrasje, pasi u mendua se i riu mund te ishte hedhur nga një lartësi prej së paku 4-5 metrash. Ndonëse kjo vijon të mbetet një hipoteze, policia thotë se dyshon më fort për një vdekje aksidentale.
Nga këqyrja në vendin e ngjarjes, dyshohet se i riu te ketë rënë nga lartësia edhe pse ka tentuar të mbahej.
Bluza që kishte veshur ishte me shenja të shpuara apo grisura, që shton dyshimet se ai ka tentuar të kacavirret për tu mbrojtur nga rënia. Megjithatë, policia nuk ka dale ende me një version zyrtar për ngjarjen. Identiteti i viktimës nuk bëhet i ditur nga raportimet e mediave italiane.
