Vijon përplasja mes kryebashkiakut Erion Veliajt dhe ministrit të Turizmit, Blendi Klosit për lejet mjedisore. Pas deklaratës së djeshme të kryebashkiakut Erion Veliaj, i cili thumboi ministrin dhe kërkoi hapur që Inspektoriatet e Mjedisit në të gjithë vendin të shkrihen, pasi janë struktura të korruptuara, dhe kjo kompetencë t’i kalojë bashkive, ka ardhur edhe një përgjigje nga Klosi.
Ministri gjatë një konference ku foli për turizimin në vend, ndër të tjera theksoi se janë prishur dëshirat e një kryebashkiaku me ligjin e ri për lejet mjedisore.
“Ndryshimi i ligjit ka prishur shumë interesa, ka ndryshuar shumë rregulla. Është e vërtetë se vendosja e rregullit ka shkaktuar shumë probleme dhe ka prishur interesa. Por është e mirë që parqet që ka na falur zoti t’i mbrojmë. Vlerat e tyre janë shumë më të veçanta se dëshirat e një kryebashkiaku, sepse duke qenë e bukur është shumë e lakmueshme. Duhen aktivitete që nuk dëmtojnë agro-turizmin dhe natyrën.” , u shpreh Blendi Klosi.
Kryetari i Bashkisë Tiranë, Erion Veliaj ka sulmoi hapur dje Blendi Klosin. Shkak është bërë kërkesa e Veliajt që lejet e mjedisit t’i kalojnë bashkive e t’ju hiqen inspektoriateve. Ai hodhi edhe akuza indirekte tek Klosi dhe tek dikasteri i drejtuar prej tij, duke i quajtur inspektoriatet “Struktura të korruptuara”.
