Një 24-vjeçar mbeti i plagosur mbrëmjen e djeshme në zonën e Yzberishtit në Tiranë, ndërsa policia ka arrestuar autorin e dyshuar dhe ka shpallur në kërkim një tjetër.
Ngjarja ka ndodhur rreth orës 22.45 në rrugën e Qelqit në zonën e Yzberishtit, ku shtetasit Iljaz dhe Fatmir Avdillari kanë qëlluar në drejtim të të riut, duke e lënë të plagosur në dorë.
Shkak për ngjarjen dyshohet se ka qenë frika e autorëve për një hasmëri të mundshme, dhe kanë qëlluar ndaj të riut duke e lënë të plagosur. Ngjarja fillimisht është sinjalizuar nga qytetarë të zonës të cilët kanë njoftuar sallën operative.
Policia e cila mbërriti në vendngjarje bëri të mundur arrestimin e shtetasit Iljaz Avdillari dhe shpalljen në kërkim të Fatmir Avdillarit.
“Si rezultat i reagimit në kohë dhe veprimeve hetimore të kryera u bë identifikimi, kapja dhe arrestimi i shtetasit I. A., 24 vjeç, si dhe shpallja në kërkim e shtetasit F. A. dhe vijon puna për kapjen e tij. Nga veprimet e para hetimore rezulton se më datë 25.09.2019, rreth orës 22.45 në rrugën e Qelqit, dyshohet se këta shtetas kanë qëlluar me armë zjarri dhe për pasojë është plagosur në dorë shtetasi D. V., jashtë rrezikut për jetën”, njoftoi policia.
Burime nga policia bëjnë me dije se gjatë kontrollit të ushtruar në banesën e Fatmir Avdillarit u gjetën dhe bllokuan në cilësinë e provës materiale me dy thika, në cilësinë e armëve të ftohta.
