Pak ditë më parë, dy qytetarë të Kavajës, neutralizuan autorin e dyshuar të një krimi, pak sekonda pasi ai qëlloi me breshëri automatike ndaj një personi.
Lidhur me aktin e qytetarëve që neutralizuan autorin ka reaguar edhe Presidenti Ilir Meta, i cili ka takuar Bajram Shalën dhe Ymer Xhafën.
Postimi i Metës
Kënaqësi e veçantë të takoja sot dy qytetarë të mrekullueshëm të Kavajës, z.Ymer Xhafa dhe z.Bajram Shala, të cilët dy ditë më parë rrezikuan jetën e tyre për të neutralizuar një shtetas të armatosur në qendër të qytetit, i cili plagosi një shtetas tjetër, ngjarje që mund të kthehej në një tragjedi të madhe.
I falenderova përzemërsisht për aktin e tyre të lartë qytetar, në mbrojtje të jetës, paqes sociale dhe sigurisë publike.
Shembuj të tillë frymëzues i duhen mbarë shoqërisë tonë, për të qëndruar larg konflikteve, dhe për të reaguar kundër dhunës, krimit por dhe indiferencës, që rrezikon jetën, pronën e sigurinë qytetare.
