Dalin pamjet e shqiptarëve të ndaluar nga autoritet greke. Në një video të publikuar nga një televizion helen, dallohen dy persona mbi një gomone me duar lart, përballë të cilëve duken katër të tjerë me uniformë të cilët u kanë drejtuar armët e zjarrit. Këta të fundit, siç bëjnë me dije mediat helene, janë efektivë të Rojës Bregdetare.
Siç njoftoi policia shqiptare, operacioni u zhvillua në kufirin mes Turqisë dhe Greqisë. “Policia Greke gjatë operacionit ka kapur një prej mjeteve lundruese, brenda të cilit nuk është gjetur lëndë narkotike dhe ka ndaluar dy shtetas shqiptarë dhe një shtetas italian që ndodheshin në bordin e skafit”, bëri me dije policia.
Mediat greke raportuan se operacioni nisi pas dyshimeve se në mjetin lundrues transportohej drogë. Raportohet se ka pasur një sinjalizim nga autoritet turke. Efektivët grekë kanë qëlluar me armë zjarri në ajër në aksionin për të ndaluar gomonen, sipas të njëjtave burime.
U raportua gjithashtu se gomonia u nis nga Shqipëria, por Policia shqiptare njoftoi se nga shkëmbimi i informacionit me homologët grekë, “nuk ka asnjë të dhënë që mjetet lundruese të jenë nisur nga Shqipëria”.
Helikopterët dhe aeroplanët e FRONTEX, si dhe Forca Ajrore greke po mbikqyrnin aksionin.
Ende nuk ka të dhëna mbi identitetin e personave të ndaluar.
