Dy shtetas shqiptar dhe një italian kanë rënë në pranga pas një operacioni të madh antidroge të realizuar nga policia greke, pasi dy gomone që dyshohet se ishin nisur nga Shqipëria, kanë tentuar të futet në ujërat turke, raportuan mediat greke.
Sipas të njëjtave burime, “fillimisht gomonet janë pikasur nga rojet bregdetare turke të cilët i kanë ndjekur nga pas, por pa sukses. Në ndihmë të tyre erdhën edhe 10 anije greke, një avion dhe një helikopter i FRONTEX, të cilët bënë të mundur kapjen e njërës prej gomoneve”.
Po sipas mediave greke, në këtë operacion policor, raportohet se ka pasur edhe të shtëna. Ndërkohë raportohet se vijojnë kërkimet për gjetjen e gomones së dytë.
Pas lajmit, ka reaguar edhe policia shqiptare, që mohon që gomonet të jenë nisur nga Shqipëria. Policia e Shtetit, në një njoftim zyrtar sqaron se nuk ka asnjë të dhënë që mjetet lundruese të jenë nisur nga Shqipëria, por konfirmon se dy shqiptarë janë ndaluar.
“Në lidhje me një lajm të bërë publik në disa media, të cilat i janë referuar burimeve mediatike greke se dyshohet që dy gomone janë nisur nga Shqipëria dhe se Policia Greke është duke zhvilluar operacion, sqarojmë opinionin publik se: Nga komunikimi paraprak me homologët grekë, lajmi i dhënë në media është tërësisht i pavërtetë. Operacioni zhvillohet në kufirin mes Turqisë dhe Greqisë dhe jo në kufirin mes Greqisë dhe Shqipërisë dhe nga komunikimi i deritanishëm dhe shkëmbimi i informacionit nuk ka asnjë të dhënë që mjetet lundruese të jenë nisur nga Shqipëria. Policia Greke gjatë operacionit ka kapur një prej mjeteve lundruese, brenda të cilit nuk është gjetur lëndë narkotike dhe ka ndaluar dy shtetas shqiptarë dhe një shtetas italian që ndodheshin në bordin e skafit. Policia e Shtetit vijon shkëmbimin e informacionit me homologët për dy shtetasit shqiptarë dhe është në ndjekje të operacionit nga homologët grekë”, thuhet në njoftimin e policisë shqiptare.
