Në krah të bashkëkryetarëve të Komisionit parlamentar të Reformës Zgjedhore, Damian Gjiknuri dhe Rudina Hajdari, kreu i Prezencës së OSBE-së në Shqipëri, Bernd Borchardt ka vënë theksin në fillimin e dialogut politike në vend.
Duke folur në tryezën për reformën zgjedhore, ku edhe opozita e bashkuar përfaqësohet me 3 ekspertë, Borchardt ka kërkuar nga partitë që të japin propozimet e tyre lidhur me këtë reformë.
Borchardt theksoi se duhet të ketë pjesëmarrje të gjerë për reformën, ndërsa shtoi se ajo duhet të bazohet në rekomandimet e dhëna edhe nga OSBE/ODIHR.
Sipas tij, palët duhet të bien dakort nëse duhet ose jo të ndrsyhohet sistemi zgjedhor.
“Vendi ka nevojë për dialog dhe unitet dhe kjo është sfida e OSBE-së.
Dje parlamenti gjerman kaloi një mocion që mbështesin hapjen e negociatave. Reforma zgjedhore është shumë e rëndësishme dhe kjo është edhe në rekomandimet e OSBE-së.
Vitin e kaluar ka pasur progres për reformën zgjedhore kanë bashkëpunuar të gjithë aktorët politikë. Do të diskutojmë sot se çfarë efektesh do të ketë sistemi i ri zgjedhor dhe si do të ndikojë më tej.
Pres nga partitë që të japin propozime konkrete. Është e rëndësishme ti rikthehemi dialogut, pasi kjo do të ndikojë patjetër te reforma zgjedhore. Shpresoj që kjo konferencë të ndikojë në procesin e mëtejshëm.
Është një zgjedhje që duhet ta bëjnë partitë shqiptare. Duhet të jeni të hapur për të diskutuar për këtë çështje. Pjesëmarrja duhet të jetë gjithëpërfshirëse.
Duhet të merret vendimi, a duhet ta ndryshojë Shqipëria sistemin zgjedhor. Ne nuk mund të bëjmë imponime, kemi dhënë rekomandimet tona”, tha ai.
