Tedi Blushi, zëdhënësi i Presidentit Ilir Meta ka reaguar ndaj deklaratave të Kryetarit të Grupit Parlamentar të Partisë Socialiste Taulant Balla, i cili i konsideron veprimet e numrit një të shtetit në shkelje të Kushtetutës.
Në një postim në rrjetin e tij social Facebook, Blushi, i kujton Ballës se duhet të rrijë i qetë, pasi zëdhënësi i Presidentit është ai. Bala gjatë një interviste për DË është shprehur se presidenti Meta ka shkelur kushtetutën dhe si çdo qytetar i thjeshtë që shkel ligjin duhet të përgjigjet për shkeljet që bënë.
Postimi i plotë i Blushit
E falenderoj zotin Taulant që ka vendosur të luajë edhe rolin e Zëdhënësit të Presidentit, por e sqaroj se Zëdhënësi zyrtar jam unë!
Të jetë i qetë dhe i sigurt, se jo vetëm Bundestagu apo OSBE/ODIHR, por e gjithë bota e di që Presidenti Meta nuk ka shkelur Kushtetutën.
Presidenti Meta, jo vetëm ka respektuar Kushtetutën, por edhe:
– Konventën Europiane për të Drejtat e Njeriut;
-Vendimin e Gjykatës së Strasburgut që përcakton se e drejta e zgjedhjes nuk është proceduriale, por substanciale për të garantuar rendin demokratik;
– Detyrimet e Shqipërisë ndaj Marrëveshjes së Stabilizim Asociimit për garantimin e lirive dhe pluralizmit politik;
– Kriteret e Kopenhagenit, që janë në themel të BE.
Për këto ka folur qartë dhe Raporti Final i OSBE/ODIHR për zgjedhjet antikushtetuese dhe të paligjshme të 30 qershorit!
Ia kujtoj zotit Taulant të gjitha këto meqë sot ka qenë shumë i hutuar kur ka folur në emër të Presidentit.
Ndoshta është lodhur duke lobuar në Berlin për vendosjen e kritereve historike për çeljen e negociatave!
