Nga BoldNews.al
Në këto vitet dhe muajt e fundit kemi përjetuar disa tërmete, madje me disa kuptime.
Kemi dëgjuar për Tërmetin e Rilindjes në Tepelenë që ka prodhuar batuta dhe meme në rrjet.
Më pas u shfaq Vangjush Dako me duart si akullore që një ditë të bukur shkaktoi tërmetin e rradhës në Rilindje duke u bërë pjesë e listave të zeza të Departamentit amerikan të Shtetit.
Por së fundmi, dhe më i rëndi, duket se është tërmeti i sotëm, që mund të pagëzohet me emrin “Sako”.
Uraganët që godasin SHBA kanë një emër, po kështu edhe stuhive që godasin Europën i venë një emër, ndaj dhe kësaj lëkundjes së sotme, është gjynah mos i vihet një emër.
Sipas sizmiologëve është tërmeti më i fortë i 30 viteve të fundit, dhe çuditërisht epiqendrën e kishte në Durrës.
Tërmeti “Valbona” ndoshta s´ka lidhje të drejtpërdrejtë me Valbonën e Bashkisë, por ja që lëkundjet e shkundën mirë jo vetëm qytetin bregdetar, por gjysmën e vendit.
Ndoshta Valbonës i qëlloi të jetë kryebashkiake në kohën e gabuar, ndoshta tërmeti mund të ndodhte pak muaj më parë kur ishte Vangjushi Kryebashkiak…
Për fat të mirë ose jo, qëlloi që lëkundja më e fortë të ndodhë pikërisht kur Bashkinë e Durrësit, atje ku u regjistrua edhe epiqendra e tërmetit me intensitet 7.5, t´a drejtojë Valbona.
Kësaj të fundit, megjithëse me më pak se dy muaj si kryebashkiake, i mbeti të përballojë pasojat, falë Zotit jo përsa i takon dëmeve, por panikut.
Njerëzit janë në rrugë, të frikësuar dhe tromaksur, dhe shpresojnë që të kalojnë një natë të qetë.
Në qytet qarkullojnë fjalë se Kryebashkiakja ka mbledhur menjëherë stafin e bashkisë dhe ka shprehur gadishmërinë për të përballuar situatën.
Thuhet se një nga punonjësit e pranishëm ka thënë se në 12 vitet e Dakos Kryebashkiak, lëkundje të tilla nuk janë ndier.
Nuk dihet pse, por Valbonës i ka djegur kjo batutë e vartësit të saj, dhe për t´u shfajësuar ka thënë se ajo s´ka lidhje me tërmetin.
Qytetarët, që prej orësh qëndrojnë në lulishte nga frika e lëkundjeve të tjera, thonë se Valbona ka “fajësuar” Vangjushin, me dyshimin që ai mund t´a ketë ditur që do të ndodhte një lëkundje e tillë, ndaj dhe nuk kërkoi një tjetër mandat.
Por, kjo s´ka rëndësi. Vangjushi i la qytetit ndoshta ndërtime shumëkatëshe, beton, “duart si akullore”, “supermenin”, skemat si fitoheshin zgjedhjet etj etj, ndërsa Valbona duket se e ka nisur me “tërsëllim”.
Në 3 muajt e parë, shkundi si asnjëherë në 3 dekada ndërtesa e njerëz, ndaj sot qytetarët nga lulishtet urojnë që në 3 muajt e dytë, të paktën mos përsërisë të njëjtën lëkundje. Ndryshe njerëzit mund të preferojnë më shumë “Vangjushin me duart si akullore” sesa tërmetin “Valbona”.
