Gjykata e Krimeve të Rënda jep sot vendimin për ish-ministrin e Brendshëm, Saimir Tahiri.
Prokuroria kërkoi në seancën e fundit të gjykimit ndaj tij dënimin me 12 vjet heqje lirie, ndërsa Tahiri kërkoi rrëzimin e akuzave dhe shpalljen i pafajshëm.
Gjykata e shtyu seancën për në datën 19 shtator, kur do të lexohet mbrojtja e Jaeld Çelës dhe më pas treshja gjykuese do të tërhiqet për të dhënë vendim.
Duke përfituar nga gjykimi i shkurtuar, prokurori kërkoi për Tahirin dhe ish drejtorin e Policisë së Vlorës, Jaeld Çelën, dënimin me nga 12 vite burg përfundimisht.
Në një seancë, e cila zgjati më shumë se 8 orë, tre prokurorët e çështjes, Arens Çela, Dritan Prençi dhe Vladimir Mara, lexuan pretencën duke renditur provat dhe faktet që sipas tyre, vërtetojnë fajësinë e ish-ministrit në trafikimin e lëndëve narkotike në kuadër të grupit kriminal.
Në disa raste, fjala e prokurorëve u ndërpre nga ish-ministri dhe avokati i tij, të cilët kërkuan nga prokurorët të lexonin faktet penale të cilat i atribuoheshin atij dhe jo personave që tashmë janë dënuar dhe nuk kishin lidhje me procesin që po zhvillohej. Me gjithë pretendimet e ngritura nga mbrojtja, për Prokurorinë ishte e nevojshme pasqyrimi i aktivitetit për të parë rolin e Policisë.
Prokuroria për Krime të Rënda është mbështetur në një sërë përgjimesh mes anëtarëve të grupit kriminal në pretencën e lexuar dje. Duke analizuar përgjimet, Akuza ka dalë në përfundimin se nga bisedat kuptohet që ata kishin mbështetjen e Policisë së Vlorës. Por, përgjimet u panë me skepticizëm nga Saimir Tahiri, i cili tha se Prokuroria nuk ka bërë asnjë veprim për verifikimin e vërtetësisë së këtyre përgjimeve dhe në asnjë rast nuk vërtetohet se trafikantët janë duke folur për të, apo edhe për ndonjë nga Policët.
Ekskluzive/ Përgjime e dokumenta, Moisi Habilaj udhëtim në Romë me “gjigandin Bashkim” Tahiri
