Tallte dhe ofendonte në telefon dhe me SMS, ish-bashkëshorten duke e shtyrë drejtë vetëvrasjes, arrestohet 46-vjeçari nga Durrësi i shpallur në kërkim policor.
Sipas Policisë, një 46-vjeçar i shpallur në kërkim është ndaluar nga Specialistët për Krimet në Stacionin e Policisë Plazh, të cilët kanë ekzekutuar urdhrin e prokurorisë.
Nga burimet zyrtare mësohet se bëhet fjalë për shtetasin me iniciale V.A., banues në Durrës. 46-vjeçari akuzohet për veprat penale “Përndjekja”, “Shkaktim i vetëvrasjes”, “Veprime në kundërshtim me vendimet Gjykatës” dhe “Përdorimi me keqdashje i thirrjeve telefonike”.
Të njëjtat burime thanë për“Panorama” se 46-vjeçari përndiqte ish-bashkëshorten, pavarësisht se kjo e fundit ishte me urdhër mbrojtjeje nga Gjykata e Durrësit. Mësohet se disa kohë më parë, çifti (prindër të një djali) ishin ndarë, pasi bashkëshorti ushtronte sistematikisht dhunë psikologjike dhe fizike ndaj të shoqes.
Shpeshherë ajo e kishte denoncuar në Polici bashkëshortin, por pavarësisht kësaj, dhuna vijonte. Në këto kushte, gruaja kishte vendosur t’i jepte fund martesës dhe në muajin gusht nisi procedurat e divorcit duke iu drejtuar Gjykatës së Durrësit.
Mirëpo edhe pas ndarjes, situata nuk mori zgjidhje, pasi V.A. vijonte ta shqetësonte tashmë ish-bashkëshorten, madje duke kryer veprime në kundërshtim me vendimet e Gjykatës. Ai nuk e ka pritur mirë vendimin e bashkëshortes, e cila kërkoi divorcin dhe, duke mos ia arritur qëllimit për ta bindur të ktheheshin bashkë, nisi sulmin nëpërmjet telefonit.
Madje, mësohet se ai arriti ta shqetësonte dhe ta rëndonte psikologjikisht ish-bashkëshorten, deri sa kjo e fundit tentoi të vetëflijohej duke pirë mbidozë me ilaçe. Por për fatin e saj të mirë, të afërmit e pikasën shpejt dhe e dërguan me urgjencë drejt Spitalit të Durrësit, ku bluzat e bardha arritën t’i shpëtonin jetën.
Në deklaratën e saj për Policinë, bashkëshortja tha se kishte arritur në këtë pikë pasi ish-burri e merrte në telefon pa pushim dhe e tallte, fyente dhe kërcënonte.
“Një 46-vjeçar i shpallur në kërkim nga Policia e Durrësit është ndaluar nga Specialistët për Krimet në Stacionin e Policisë Plazh, të cilët kanë ekzekutuar urdhrin e prokurorisë. Bëhet fjalë për shtetasin me iniciale V.A., banues në Durrës. Ai akuzohet për veprat penale ‘Përndjekja’, ‘Shkaktim i vetëvrasjes’, ‘Veprime në kundërshtim me vendimet Gjykatës’ dhe ‘Përdorimi me keqdashje i thirrjeve telefonike’, tha Policia.
/Panorama
