Rudina Hajdari ka reaguar ndaj analistit Fatos Lubonja, pasi ky i fundit u shpreh gjatë një interviste se ajo nuk ka asnjë meritë për të qenë deputete.
“Edhe njerëzit e Edi Ramës e shikojnë se është trashur aq shumë sa nuk rrinë dot pa folur ndonjë gjë për të justifikuar vetveten. Kjo tregon se çfarë skandali PPP-sh janë rruga Milot-Balldre dhe Orikum-Dukat. Do të ishte një sinjal që tregon se edhe aty brenda PS-së, nëse u ka ngelur ndonjë fije yndyre duhet të reagojnë se nuk mund të bëhen bashkëpunëtor të vjedhjeve në këtë mënyrë. Për sa i përket vlerësimit për Rudina Hajdarit dhe opozitarët atje, minimalisht mund të mos hynin sepse ata legjitimuan një sistem që vjedh kështu.
Në momentin kur partia jote merr vendimin dramatik, ti nuk mund të bëhesh gardh thyes dhe largohesh. Futja aty është një gjë kompromentuese për mua. Kjo ka hyrë si vajza e Azem Hajdarit aty dhe kjo është një problem për PD. Ku i ka meritat ajo, çfarë kontributi ka. Pse me trashëgimi i kemi postet? Kjo flet edhe për PD-në. Ajo që i bëri Rudina Hajdari PD-së duhet të ishte mësim, por ata nuk mësojnë, nxjerrin një fëmijë tjetër, ose vëllain e Rudina Hajdarit”, u shpreh Lubonja.
Përmes një statusi në ‘Tëitter’, Hajdari i është përgjigjur Lubonjës, duke e quajtur gazetari misogjene.
“Kjo është ajo që unë e quaj gazetarinë misogjene. Nëse jeni i ri dhe një grua, me sa duket nuk keni asnjë meritë të jeni në politikë sipas këtij burri të moshuar. Megjithatë ai dëshiron që vendi të ketë institucione më demokratike’, shkruan Hajdari në Twitter.
