Banorët e Laprakës kanë protestuar sërisht kundër ndotjes së ajrit nga fabrika e çimentos “Edil Centro”, e ngritur në këtë zonë të kryeqytetit.
Qytetarët të irrituar nga indiferenca e institucioneve shtetërore kanë drejtuar gishtin drejt kryebashkiakut Erjon Veliaj.
Kjo bashki që përze fshatarët e shkretë që shesin një dorë spinaq dhe i degdis s’dimë se ku, lejon këtë biznes së madh të na marrë frymën, shprehen banorë të zonës.
Banorët shprehen të shqetësuar për pluhurin toksik që çliron fabrika, i cili krijon probleme me frymëmarrjen.
“Më 20 maj kemi bërë takimin e fundit me fabrikën. Na thanë na lini tre muaj se kemi filtrat të shkatërruar. Kaluan… Ku e gjejnë fuqinë këta që vazhdojnë kundër ligjit?
Ne një makinë të vogël kemi e s’na e kalojnë tek Kolaudimi për ndotjen, aq e vogël sa është. Po gjithë ky oxhak?! Ne do ta ndjekim protestën në rrugë ligjore dhe në fund pastaj…
Kjo nuk është protestë mjedisore, është protestë për jetën se po vdesin njerëzit nga kanceri. Këta e kanë pezulluar punën ditën dhe e kanë trefishuar natën.
Këta janë shumë arrogantë, po na vrasin. Kjo është vrasje e heshtur”, janë disa na mesazhet që vijnë nga Lapraka, jo shumë larg qendrës së kryeqytetit.
