Ambasadori i BE në vendin tonë, Luigi Soreca i bëri apel klasës politike shqiptarë që dialogu duhet të fillojë me reformën zgjedhore.
“Ju e dini që ne u kemi kërkuar të gjitha partive që të përfshihen në dialog dhe të marrin pjesë në dialog. këtë e kemi bërë nga hera, janë të shumta thirrjet që kemi bërë për dialog. Më lejoni që të them se dialogu duhet të fillojë nga dicka specifike, dhe kjo mund të jetë reforma zgjedhore, që është shumë e rëndësishme dhe e nevojshme, pasi do të sillte një gjë shumë të rëndësishme për shqiptarët. Kjo të bëhet në një mënyrë të drejtë dhe me standardet ndërkombëtare. Çelja e negociata do të ndihmonte edhe përsa i përket dialogu” tha ai.
Lidhur me vendimin për hapjen e negociatave, tha se Shqipëria është gati. “Ky moment është i rëndësishëm. Fokusi i këtyre ditëve duhet të jetë tek integrimi. Negociatat për Shqipërinë dhe Maqedoninë e Veriut në tetor, unë kam ndjesinë se vendet po përgatiten për këtë avancim ndërkohë që diskutohet me qeverinë shqiptare, por edhe me Brukselin për të ecur përpara siç duhet. Ka deklarata nga vendet anëtare që qartësisht thonë sinjale pozitive. Gjermania është shprehur hapur se tani është koha që të çelen negociatat. Ne besojmë se është tani momenti. Mendojmë se vendet skeptike po reflektojnë. Autoritetet shqiptare kanë për detyrë të merren me këtë deri në tetor. Është e rëndësishme që kontakti të vijojë këto 5 javë. Kryeministri Edi Rama është në Berlin sot, ku ka takuar Merkel dhe jam i bindur se qeveria gjermane do e mbështesë Shqipërinë, pasi Shqipëria është gati”.
Në fjalën e tij gjatë një aktiviteti në kryeqytet, ambasadori u ndal edhe te reforma në drejtësi.
“Javët dhe muajt në vijim do të jenë kyçe pasi jemi afër krijimit të SPAK e BKH. Gjyqtarët e prokurorët po diskutojnë se si mund të ndiqet në mënyrë efikase lufta kundër korrupsionit dhe krimit të organizuar. Bisedoj shpesh me qytetarët kur shkoj në bashki të ndryshme apo kur ec në rrugë shoh që qytetarët kanë shpresa dhe e dinë që këto reforma në drejtësi do kenë ndikim pozitiv në jetën e tyre, ky është edhe mendimi i BE”, tha Soreca , duke përsëritur se “20 mln euro do të vihen në dispozicion për rezultatet në këtë drejtim, për hetime financiare, konfiskimet, akademisë së sigurisë dhe bashkive për zbatimin alternativave ekonomike punëve të ndryshme në rajone”.
“Partneriteti ynë shkon përtej zbatimit të ligjit si mbështetje mjedisit dhe përmirësimi i cilësisë së ujit. Po ashtu, 6 mln euro do vihen në dispozicion për rehabilitimin e Bylisit, një vendit unik për Shqipërinë”, u shpreh Soreca.
