Presidenti Ilir Meta tha mbrëmjen e sotme se nuk trysnohet nga askush, brenda dhe jashtë vendit, pavarësisht fuqisë që ka bërthamore ose jo.
Në studion e Syrit, Meta theksoi se shtyrja e zgjedhjeve të 30 qershorit, duke anulluar mbajtjen e zgjedhjeve vendore në këtë datë, kishte të bënte me sigurinë kombëtare, shmangien e përplasjeve mes qytetarëve shqiptarë.
“Mora vendimin për të shmangur një përplasje civile, një gjakderdhje mes qytetarëve dhe një rrezik ndaj demokracisë shqiptare, pavarësisht niveleve që ajo ka”, tha Meta.
Presidenti theksoi se nga Gjermania ka pasur dhe ka përpjekje madhore që Shqipëria të mos ndahej nga Maqedonia e Veriut përsa i takon hapjes së negociatave me BE-në.
I pyetur lidhur me raportet me kancelaren Merkel, Meta tha se “ajo nuk është një interlokutore e drejtpërdrejtë e tij, pasi ajo është Kancelare dhe jo Presidente. Raportet me Presidentin gjerman i kam të shkëlqyera, ndërsa me znj. Merkel kemi pasur përshëndetje, shkëmbime letrash, por ajo nuk është interlokutorja ime”.
Meta tha se përgjegjësia e tij është të garantojë stabilitetin e Shqipërisë, dhe roli i tij në arenën ndërkombëtare, lidhur me këtë përgjegjësi dihet dhe vlerësohet.
