Presidenti Ilir Meta komentoi mbrëmjen e sotme situatën në Kosovë dhe liderët politikë, duke theksuar se e ka mbështetur Ramush Haradinajn edhe kur demarkoi kufirin me Malin e Zi dhe kur doli kundër ndarjes së Kosovës me Serbinë, sipas planit Vuçiç-Rama-Thaçi.
Sipas Presidentit Meta, këto janë dy çështje të ndryshme.
“Do të ishte diçka e papranueshme për çdo shqiptar në botë që Presidenti i Shqipërisë të vinte në dyshim kufinjtë e Republikës së Kosovës.
Presidenti i Republikës së Shqipërisë do të ishte i fundit në botë që të pranonte një gjë të tillë.
Udhëheqësit e Kosovës, do të japin llogari para Kosovës”, tha Meta në studion e Syri-t.
Ndërsa duke folur për dialogun Kosovë-Serbi, Presidenti u shpreh se Shqipëria nuk duhet të ndërhyjë në këtë situatë.
“Shqipëria nuk ka punë me dialogun me Serbinë. Por dialogu Kosovë-Serbi është detyra juaj. Ne ju mbështesim, diskutoni me njëri-tjetrin, koordinohuni me SHBA, Britani, Gjermani dhe merrni vendimin më të mirë”, u shpreh Meta.
