Njësia e Kërkim Arrestimit do të quhet njësia e re e Policisë së Shtetit, e cila do të ketë fokusin në arrestimin e “të fortëve” në kërkim. Ministri i Brendshëm Sandër Lleshaj, ka prezantuar këtë njësi speciale, ku ka parë nga afër disa veprime operacionale, pjesë e programit që po zhvillon Njësia, që prej disa javësh, nga dita e krijimit të saj.
“Kjo Njësi, e cila do të jetë një ndër Njësitë elitë të Policisë Shqiptare, do të jetë pikërisht prova e këtij angazhimi serioz, për të kërkuar kudo që të jetë dhe për të vënë para drejtësisë këdo që ka llogari të hapura me të. Kjo është e para që dua t’iu them.
E dyta, kjo Njësi do të jetë edhe një element i rëndësishëm bashkëpunimi me partnerët tanë ndërkombëtar, për arsye se së shpejti, Njësia do të jetë pjesë e rrjetit europian të njësive që merren me kërkimin e personave që i janë shmangur drejtësisë“, – u shpreh Sandër Lleshaj.
