Sajmir Tahiri, ish-ministër i Brendshëm për të cilin prokuroria kërkoi dënimin me 12 vjet burg, deklaroi para gjykatës se ka fjetur në hotele me maksimumi 140 euro nata.
“Ju më akuzoni se jam pjesë e trafikut. Jam trafikant që fle me 140 euro nata maksimumi. Pasuria ime është verifikuar në të gjithë Evropën. Është parë sesa kam paguar. S’kam paguar as 700 dhe as 900 euro nata”, ka deklaruar Tahiri.
Deklarata e ish-ministrit të Brendshëm duket se ka thumbuar në distancë ministren e Drejtësisë, Etilda Gjonaj, të cilës i janë publikuar fatura në hotele me 700 euro nata, por edhe nënkryetarin e Bashkisë së Tiranës, krahun e djathtë të kryebashkiakut Erjon Velian, Arbion Maznikut, të cilit firma Fusha shpk i ka paguar 900 euro natën në një hotel në Barcelonë.
Ndërkohë lidhur me provat e paraqitura nga prokuroria mbi përgjimet që i janë bërë Habilajve, të cilët shprehen në biseda se janë me shefin e madh, Tahiri tha se “Habilaj është përgjuar duke thënë se jam me shefin e madh në daten 22.11.2013, por unë kam qenë në Bruksel për integrimin e Shqipërisë.
Në datë 23 nëntor 2013, Habilaj është përgjuar duke thënë se jam këtu me shefin për drekë, por unë në 23 nëntor në orarin e përgjuar, kam qenë në konferencë për mediat, lidhur me rastin e të arratisurve nga burgu i Drenovës.
Kam qenë në zyrë në takim me kreun e SHISH dhe ministrin e Drejtësisë”.
“Prokuroria më akuzon për katër episode, që kanë ndodhur në vitet 2013-2015. Si ka mundësi që prokururia të më akuzojë për kultivim drogë para se të marr detyrën e ministrit të Brendshëm? Policia e Shtetit më 3.10.2013 ata janë dërguar në procedim penal. Si mundet që t’i dërgoja në procedim nëse i favorizoja në trafikun e drogës? Të paktën në dy rastë të tjera, Policia e Shtetit i ka denoncuar dhe proçeduar vëllezërit Habilaj. Artan, Florian dhe Moisi Habilaj, për pengmarrje. Janë dërguar në vijën e dytë për kontroll në TIMS. Si mund t’i bëja nëse i favorizoja?”, mësohet të jetë shprehur Tahiri.
Ish-ministri i Brendshëm është ndalur edhe tek çështja e radarëve që nuk punonin. Ai ka treguar se ka patur një shkresë “Top Secret” të cilën ia ka dërguar ish-ministres së Mbrojtjes, Mimi Kodheli, ku e ka informuar se policia ka konstatuar se radarët nuk punojnë.
“Unë në kohën që kam qenë ministër i Brendshëm, në vitin 2016, i kam dërguar një shkresë konfidenciale, “Top Secrete”, koleges sime, ish-ministres Mimi Kodheli. Në këtë shkresë, e kam vënë në dijeni se radarët e ushtrisë nuk punonin, pasi Policia kishte konstatuar mosfunksionimin e tyre, duke hapur një rrugë të re për trafikun e drogës”, tha Tahiri.
