Presidenti Ilir Meta ka postuar një video në rrjet ku shfaqet i rrethuar nga macet.
“Një mëngjes me një “buqetë” macesh, gjithmonë relaksues! Ato janë të dashura dhe ledhatare. Por ka edhe ndonjë guximtare që ngjitet lart, pa llogaritur rrezikun në kthim. Unë qëllova aty, për t’ia bërë të lehtë zbritjen”, shkruante Meta në mesazhin e tij.
Presidenti pritet të përballet të hënën në Komisionin Hetimor Parlamentar që kërkon shkarkimin e tij, ndërsa ka konfirmuar pjesëmarrjen.
Prej muajsh Kreu i Shtetit është vendosur në një pozicion sulmi nga Rilindja, veçanërisht pas dekretit që anullonte mbajtjen e zgjedhjeve më 30 qershor dhe realizimin e tyre më 13 tetor.
Por gjithashtu, kritika të forta, Presidenti ka drejtuar ndaj një pjese të ndërkombëtarëve, që janë shfaqur në krah të Kryeministrit Edi Rama në momente kritike, edhe pse situata politike, ekonomike dhe sociale në vend ka shkuar drejt agravimit.
Nuk dihet nëse Meta mesazhin me macet ia ka drejtuar Edi Ramës, aktualisht kryetar dhe Kryeministër, që gjatë karrierës së tij politike, që në fillimet e saj, ka pasur suportin e Presidentit aktual, herë kur ishte kryeministër (2000-2002), herë si drejtues i LSI-së (2007, ku i dha mbështetjen për zgjedhjet vendore dhe më pas në 2013 kur firmosi koalicionin për qeverisjen e vendit, duke i dhënë mandatin e Kryeministrit).
