Moshapja e negociatave në tetor, fajtorët jashtë nga politika! Kështu shkruan në një postim në rrjet nënkryetari i LSI-së, Petrit Vasili, sipas të cilit tetori i këtij viti është një stacion kritik për integrimin europian të Shqipërisë.
“Ky tetor është pa asnjë diskutim më i errëti, që Shqipëria po kalon. Shpërbërja vertikale e të gjithë pushteteve është një realitet trondites:
-që nga parlamenti i asgjesuar nga kapja prej qeverisë dhe shndërrimi në noter i saj
-te qeverisja produkt dhe shërbëtore e krimit trafiqeve dhe parave të pista
-te pushteti gjyqësor i kapur, i shantazhuar e i përdhosur dhe pa gjykatat e nivelit më të lartë dhe me një prokurori, që mbulon dhe nuk zbulon krimin dhe korrupsionin
-deri te asgjesimi i themelit të demokracisë dhe ndarjes së pushteteve, që janë zgjedhjet e lira dhe të ndershme, të cilat u asgjesuan dhe u zëvendësuan nga votimet moniste në 30 qershor.
Ky moment i errët shpërbërës është prezantimi më i zymtë i Shqipërisë përballë një Europe ku kërkojmë të marrim hapjen e negociatave, të cilat kanë deshtuar për vite me radhë në këtë tetor kritik”, shkruan Vasili.
Sipas tij, zgjedhjet e lira dhe të ndershme dhe të menjëhershme do të ishin i vetmi hap, dhe asnjë tjetër, për të dhënë një sinjal përgjegjshmërie të thellë politike nga Shqipëria drejt Europës.
“Duhet një qendrim i qartë për hapjen e negociatave. Qëndrimet dele dash të deritanishme të Europës për hapjen e negociatave, vendosja e kushteve, duartrokitjet për reforma inekzistente, përgëzimet artificiale dhe hipokrite në funksion të interesave personale të burokratëve të vegjël në Bruksel, vetëm kanë rënduar së tepërmi situatën në Shqipëri”, shkruan Vasili.
Në vijim, nënkryetari i LSI-së shprehet se në tetor nuk na duhen fraza të bukura kalemxhinjsh europianë, që qendisin negociata që nuk hapen, kushte që shtohen dhe shpresa të rrema bajate të një objektivi, që s’realizohet kurrë.
“Negociata ose hapen pa asnjë kusht dhe ecim përpara ose do të thotë të shohim një film bajat të parë disa herë.
Alibi për moshapjen e negociatave nuk ka dhe as që mund të ketë”, shkruan Vasili.
