Partia Socialiste caktoi gjatë javës që sapo u mbyll 4 koordinatorë për veriun, që të gjithë deputetë dhe emra të njohur.
Përveç Senida Mesit dhe Luan Harushës që janë deputetë të Shkodrës, Rama duket se ka menduar të përforëcojë strukturat edhe me dy ligjvënës të tjerë, Musa Ulqinin, një prej deputetëve socialist me më shumë eksperiencë, dhe Arben Pëllumbin, djalin e Servet Pëllumbit, një prej figurave kryesore të PS-së ndër vite, i njohur ndryshe edhe si “profesori i socialistëve”.
Sikundër është raportuar të gjithë koordinatorët do të jenë të përqëndruar në Shkodër, atje ku duket se Rilindja ka marrë goditjen më të madhe, jo vetëm për shkak se kandidati i saj Valdrin Pjetri rezultoi subjekt i ligjit për dekriminalizimin, por edhe për shkak të kritikave të forta të ish-ministrit të Jashtëm, Ditmir Bushati, i cili për të paktën 2 vjet ishte drejtues politik i PS-së në qarkun më të madh në veri të vendit.
Pas zhgënjimit që pësoi me kandidaturën e tij për kryebashkiak, Valdrin Pjetrin, Edi Rama, i drejtoi një thirrje drejtuesve të institucioneve lokale të Shkodrës, të dorëhiqen. Thirrjes së Ramës me apo pa dëshirë iu përgjigjën 9 drejtorë, mes të cilëve edhe Edmond Emini, kryetar i PS-së në Shkodër, apo Astrit Beci, një prej emrave të propozuar fillimisht për kryebashkiak i Shkodrës në rradhët e Rilindjes, por edhe si koordinator.
Numri i drejtorëve që priten të dorëhiqen mund të arrijë në mbi 16, nga 33 drejtori që ka qarku.
Në të dy rastet Rama shmangu propozimet e Asamblesë së PS-së Shkodër, ndërsa ka vendosur veton qoftë me përzgjedhjen e kandidatit për kryebashkiak, që ishte Pjetri, ashtu edhe në përcaktimin e kordinatorëve.
Dhe duket se e gjithë kjo situatë ka shkaktuar reagimin e parë kundër Ramës. Sikundër raportohet, në strukturat e PS-së në Shkodër ka nisur një lëvizje kundër Kryeministrit, ku përfshihen disa nga drejtorët e dorëhequr. Mësohet se atyre i janë bashkuar edhe disa drejtues të Organizatave Socialiste, por edhe anëtarë të këshillit bashkiak, që duket se nuk parapëlqejnë emërimet në kryeqendrën e Veriut t’i bëjë qendra, propozimet e tyre të përfundojnë në kosh, ndërsa gjithçka të bazohet te dy deputetët Luan Harusha dhe Tom Doshi.
Burime nga PS shprehen se aktualisht në Shkodër nga emra të njohur dhe me peshë elektorale po përgatitet një peticion drejtuar Edi Ramës, ku i bëhet e njohur gjendja e strukturave, por edhe përgjegjësia që ai ka në përzgjedhjen e emrave të kandidatëve, qofshin edhe përsa i takon listave të këshillit bashkiak në votimet e 30 qershorit.
Nuk dihet se kush qëndron pas organizimit të kësaj lëvizjeve dhe çfarë roli mund të ketë deputeti Ditmir Bushati, i cili nuk ka nguruar të shprehë kritika të forta, dhe të kërkojë reformimin e sistemit, veçanërisht sa i takon përzgjedhjes së kandidaturave apo emrave që promovohen në pozicione drejtuese.
Por burimet shprehen se referuar situatës së krijuar me strukturat socialiste në Qarkun e Shkodrës, ku duket se në hije ka mbetur edhe Paulin Sterkaj, Rama ka menduar të balancojë situatën duke shtuar numrin e kordinatorëve nga 1 në 4.
Të gjithë emrat e caktuar janë deputetë të bindur ndaj tij, por që mund t’i kthehen edhe në bumerang, referuar faktit se emrat e propozuara nga strukturat e PS-së sërisht nuk janë marrë parasysh.
Drejtorët e dorëhequr
1-Kadri Ymeri – Drejtor i DAR Shkodër
2- Mustaf Kraja – Drejtor i Bujqësisë Shkodër
3- Luan Heta – Drejtor i HEC Vau Dejës
4- Edmond Emini – Drejtor i Postës Shkodër ( Kryetar i PS Shkodër )
5- Agim Dardha – Drejtor Administrata e Zonave te Mbrojtura ne Shkodër
6- Astrit Beci – Drejtor i Shëndetit Publik Shkodër
7-Agim Dardha – Drejtor i Agjencisë se Zonave te Mbrojtura Shkodër /BN/
