Gerti Bogdani dorëhiqet nga pozicioni i Sekretarit të Marrëdhënieve me Jashtë të Partisë Demokratike.
Përmes një postimi në rrjet, ish-deputeti ka bërë të njohur vendimin për t’u dorëhequr nga ky funksion, ndërsa falenderon ish-kryeministrin Sali Berisha dhe kreut aktual të PD-së, Lulzim Basha, për mbështetjen që i kanë dhënë prej vitit 2007 dhe në vijim.
“Si rezultat i një kohë të gjatë në këtë pozicion, besoj ka ardhur koha për të pranuar sfida dhe angazhime të reja, për të vazhduar të jap kontributin tim për forcimin e mëtejshëm të Partisë Demokratike.
Ju garantoj ju dhe çdo anëtar të Partisë Demokratike që angazhimi dhe përkushtimi në këto sfida të reja, do të jetë gjithmonë maksimal dhe gjithmonë duke ruajtur parimin se të drejtat, mirëqënia dhe shpresa e munguar, jo vetëm e çdo demokrati, por mbi të gjitha e çdo qytetari të ndershëm shqipëtar, do të jetë ylli polar i punës sime”, shkruan Bogdani.
Në vijim, ish-deputeti demokrat thekson se beson që marrëdhëniet me jashtë dhe diplomacia e suksesshme nuk janë dhe nuk mund të jenë thjeshte burokraci, por një ndërveprim i vazhdueshëm për ngritjen e urave të komunikimit dhe forcimit të miqesive, si institucionale, ashtu dhe personale.
“Sikundër deri më sot, jo thjeshtë për shkak të detyrës, por mbi të gjitha për shkak të vokacionit dhe parimeve personale, do të vazhdoj të kontriboj për avancimin e imazhit të Shqipërisë dhe forcimit të rolit të saj jo vetëm në Rajon, por edhe më gjerë”, shkruan Bogdani.
