Gjykata e Shkallës së Parë në Vlorë ka dënuar me burgim të përjetshëm Ritvan Zykajn, për masakrën që kreu në Selenicë, ku vrau 8 pjesëtarë të familjes së tij.
Gjatë gjykimit, prokurori Saimir Smaga ndërtoi dinamikën e krimit të 8-fishtë. Sipas prokurorisë, familja e vrasësit po shkonte për të drekuar, kur njëra nga viktimat Vasilika, i kishte akuzuar prindërit e Ritvanit se ai i kishte vjedhur pulat.
Prokurori tha se pasi palët ishin sqaruar kishin vazhduar rrugën, ndërkohë që konflikti ishte diskutuar edhe gjatë drekës, në të cilin Ritvani ishte shprehur i pakënaqur për kushërinjtë që e akuzonin për gjithçka që ndodhte në fshat.
Përpara se dreka të përfundonte Ritvani është çuar 30 minuta më herët nga tavolina dhe është larguar drejt banesës, ndërkohë që pas të shtënave ai i ka dërguar njërit prej kushërinjve filmimin e dy prej të vrarëve.
Prokurori deklaroi se i riu e kishte gjetur armën të fshehur në disa shkurre larg shtëpisë dhe se pas negociatave ai u dorëzua të shtunën në mëngjes.
Vrasësi ka pranuar se ai është autori i masakrës, por nuk është hajdut. “Kushërinjtë talleshin me mua ditën e fundit u thanë prindërve se mua më urrenin të gjithë në fshat”.
Në të njëjtën ditë protestuan në Gjykatën e Vlorës familjarët e Sylkie dhe Olsi Hoxhallarit, të vrarë nga nusja e shtëpisë dhe i dashuri i saj.
Masakra në Selenicë ka ndodhur në gusht të 2018-ës.
