Etilda Gjonaj, ministre e Drejtësisë, ishte e pranishme sot në Komisionin e Ligjeve, ku u diskutua mbi dekretin e Presidentit Ilir Meta, i cili ktheu për rishqyrtim në Kuvend, ligjin për disa ndryshime në Kodin Penal.
Një nga deputetët e opozitës së re, Andi Përmeti, duket se ka shfrytëzuar rastin për të kujtuar faturën 700 euro/nata, të paguar nga ministrja Gjonaj, gjatë vizitës që kishte bërë në Itali.
Përmeti tha se duhej të miratohej një ligj që të kufizonte shpenzimet e luksit për zyrtarët.
“Unë do të propozoja ndryshime ligjore në lidhje me shpenzimet e luksit ku funskionarë të shtetit flenë në hotele 700 euro nata”, tha Përmeti, shifër kjo që përkon me atë të paguar për ministren e Drejtësisë.
Por Gjonaj e ka kaluar pa komente thumbimin e deputetit të opozitës së re, duke mos i dhënë rëndësi.