Edi Rama nuk i reziston dot tundimit për të futur duart në zgjedhje edhe kur kandidon i vetëm, pra kur s’ka kandidatë rivalë në garë. Kështu deklaroi Monika Kryemadhi, kryetare e LSI-së, duke reaguar ndaj raportit të OSBE/ODIHR për zgjedhjet e 30 qershorit.
Kryemadhi tha se raporti qartëson se edhe procesi i Vettingut kontrollohet drejtpërdrejtë nga Qeveria.
Ajo tha se raporti evidenton kërcënimet ndaj administratës për të marrë pjesë dhe votuar kandididatët e Rilindjes.
Sipas saj, raporti tregon se interpretimet e KQZ-së cënuan sigurinë juridike, ndërsa Komisioni është tërësisht i politizuar.
“Ky raport nuk njeh zgjedhjet e 30 qershorit, rruga e vetme për kapërcimin e krizës, janë zgjedhjet e lira dhe të ndershme. Secili nga ne duhet të përballet dhe secili nga ne duhet të marrë përsipër përgjegjësitë, por kryesorja bie mbi Edi Ramën”, tha Kryemadhi.
