Nënkryetari i PD-së, Edi Paloka shprehu bindjen se për disa muaj vendi do të shkojë në zgjedhje të parakohshme parlamentare.
Duke folur në një studio televizive, Paloka tha mbrëmjen e kësaj të marte se nëse zgjedhjet e parakohshme parlamentare nuk zhvillohem në 13 tetor (data e detektuar nga Presidenti Ilir Meta), atëherë do të zhvillohen maksimumi në pranverë.
“Edhe Rama do detyrohet të bjerë dakord”, deklaroi. Numri dy i PD tha se Partia Demokratike po përgatitet për zgjedhje të parakohshme.
Ndërkohë, nga kampi i mazhorancës vijon të këmbëngulet se nuk do të ketë zgjedhje të parakohshme parlamentare. Mazhoranca gjithashtu nuk njeh as 13 tetorin si datën e zgjedhjeve lokale, duke pretenduar se u zhvilluan më 30 qershor.
Paloka e vuri theksin edhe te rëndësia e reagimit popullor ndaj keqqeverisjes. “Dajaku duhet ti mësojë politikanët”, tha.
“Kajmaku bahçevan i Ramës”
Lidhur me çështje e kryebashkiakut të Vorës të dalë nga votimet e 30 qershorit, Agim Kajmaku, Paloka u shpreh: “Ka një vendim qeverie që i jep Kajmakut, nuk e di se sa euro, për të zbukuruar Surrelin. Jo vetëm e zbukuroi vilën e Ramës, por tani bën edhe bahçevanin aty. Pra, asgjë nuk është e rastësishme, Rama e ka krijuar vetë këtë qerthull dhe nuk e di si do ta zgjidhë”.
Ish-deputeti foli dhe për Valdrin Pjetrin, i cili dha dorëheqjen nga posti i kryebashkiakut të Shkodrës, pas fakteve të publikuara nga opozita, ku rezultonte se ka qenë i dënuar në Itali për trafik droge. Lidhur me këtë, Paloka tha se Rama e dinte të vërtetën më parë, por e çoi Valdrinin me zor në Shkodër. “Ai ka shkuar me vetëdije në këtë pikë, që nga farsa e 30 qershorit, vendosja e figurave kriminale, si Valdrini në Shkodër, që e çoi me zor. Me Kajmakun ka mbyllur gojën, e di shumë mirë, se i ka zgjedhur vetë”, theksoi ai.
