Serie A regjistroi këtë vit merkaton më të shtrenjtë të të gjitha kohërave.
Shifrat flasin për 1,2 miliardë euro, duke thyer rekordin e verës së kaluar ku u bë i mundur kalimi i Cristiano Ronaldos tek Juventusi e ndërsa 20 klubet italiane shpenzuan në total 1 miliard e 120 milionë euro.
5 vite më parë në kampionatin italian u investuan vetëm 400 milionë euro në blerjen e lojtarëve.
Futbolli italian ka reduktuar ndjeshëm diferencat me atë që vitet e fundit është konsideruar i paarritshëm, kampionatin anglez. Nëse Premier League mban rekord me 1,55 miliardë euro shpenzime dhe La Liga renditet e dyta me 1,32 miliardë, Seria A qëndron në vendin e tretë.
Bundesliga gjermane dhe Ligue 1 në Francë nuk e kalojnë shifrën e 750 milionë eurove në merkato.
