Zëdhënësi i Presidentit Ilir Meta ka reaguar pas rrëzimit nga mazhoranca të dekreteve të kreut të shtetit në komisionet parlamentare. Në një postim në Facebook, Tedi Blushi reagon ashpër edhe ndaj zëdhënëses së qeverisë Elisa Spiropali, pas deklaratave të kësaj të fundit kundër Metës.
“Të çmendurit, për t’i shpëtuar shiut, futen në pellg. Njësoj si e çmendura E., e cila u zhyt edhe sot në llumin e shpifjes, për t’i shpëtuar shiut të së vërtetës, duke lëshuar tymuesen e radhës, me shpresën se do largohet sadopak vëmendja nga keqperdorimi i Kuvendit për mbulimin e PPP-ve të paligjshme që u miratuan sot:
1. Ligji nr.51/2019 dhe Kontrata Koncesionare për segmentin rrugor “Porti i Jahteve – By-pass Orikum – Dukat (Ura e Shën Elizës)”, sipas ofertës vlera totale 70 119 755 euro, dhe pas negocimit dhe dakordësimit ndërmjet palëve vlera do të jetë 67 359 926 euro plus TVSH-në.
Çmimi i dakordësuar midis palëve është 16,784,906 Euro, më i lartë se kostoja e projektit e publikuar nga vet autoriteti kontraktor për konkurim.
2. Ligji nr. 52/2019 dhe Kontrata Koncesionare për ndërtimin e segmentit rrugor Milot-Balldren, ashtu si dhe kontrata Orikum-Dukat janë propozuar, hartuar nënshkruar dhe miratuar në kundërshtim me parimin e shtetit të së drejtës; në kundërshtim të hapur me interesin publik dhe në shkelje të parimit të konkurencës së lirë dhe të barazisë përpara ligjit.
Për rrugën Milot Balldren Çmimi i dakordësuar midis palëve në vlerën prej 213 665 040 Euro plus TVSH është 52,165,040 Euro, më i lartë se kostoja e projektit e publikuar nga vet autoriteti kontraktor për konkurim.
Për t’i dhënë një mbrojtje këtij procesi të paligjshëm, dhe për të shmangur çdo përgjegjësi nesër, qeveria ka miratuar një rregull të ri, për t’ia kaluar përgjegjësinë Kuvendit, me qëllim amnistimin e gjithë procesit të zhvilluar në paligjshmëri të plotë.
Keqardhje për të çmendurën E., e cila pasi u përdor për të nxjerrë me këpucë të kuqe doganat, po ofrohet për t’i nxjerrë dritat e kuqe edhe ekonomisë kombëtare”, shkruan Blushi.
Komisioni i Ekonomisë dhe Financave rrëzoi sot dekretet e presidentit Meta që riktheu për shqyrtim në Kuvend. Komisioni Parlamentar i Ekonomisë ka vendosur gjatë mbledhjes së të martës rrëzimin e dekreteve për “Për privatizimin dhe dhënien në përdorim shoqërive tregtare”, ligjin për Koncesionet, PPP-të dhe zhvillimin e territorit dhe dy dekretet e tjera të Metës për ndërtimin me koncesion të segmenteve rrugore Orikum – Dukat dhe Milot- Balldren. Ndërsa në Komisionin për Veprimtarinë prodhuese, tregtinë dhe Mjedisin u vendos rrëzimi i dekretit për disa shtesa dhe ndryshime për planifikimin dhe zhvillimin e territorit. Me 11 vota pro dhe 1 kundër komisioni rrëzoi dekretin për Privatizimin e shoqërive tregtare.
