Në profilet e policisë kriminale shkruhet se një person që ska asgjë çfarë të humbë është disa herë më i rrezikshëm se një person i pasur që jeton mirë dhe që vuan po i hoqe privilegjet e përfituara.
Kjo vlen edhe për gazetarinë në vendin tonë. Përshembull skandalet i zbulojnë gazetarë të keqpaguar, të trajtuar në periferi dhe të margjinalizuar nga pronarët e mediave të lidhur me pushtetin.
Skandalin “Tahiri-Habilaj” e zbuloi Basir Çollaku, që ishte aq i “çmendur” profesionalisht sa i besoi ish-efektivit të Policisë Dritan Zagani, se klani Habilaj përdorte makinën e ministrit të Brendshëm Sajmir Tahiri për trafik të lëndëve narkotike. Ngjarjet më pas do ti jepnin të drejtë.
Skandalin “Geron-Xhafaj” e zbuloi Jetmir Olldashi, që kishte guximit të ndiqte pistën e përfshirjes sërish në aktivitet kriminal të vëllait të ministrit të Brendshëm Xhafaj, dhe që ngjarjet e më pasme i dhanë të drejtë.
Skandalin “Dh-Albania“, e transmetoi tek të Paekspozuarit Ylli Rakipi, kur asnjë media tjetër apo prima donna të gazetarisë multi milionere nuk e mori përsipër. Skandali plasi, ministrit Gjiknuri u trondit në pozitën e tij në qeveri dhe më pas u hoq me stil nga shefi i tij. Sot Ylli Rakipi është pa punë, pa Tv. Fatura erdhi.
Skandalin e “700 euro nata të hotelit të ministres Gjonaj” e zbuloi Merxhan Daci, një gazetar i ri në një media të re online, e që më pas ekspozoi luksin fshataresk të atyre që do bëjnë reformën në drejtësi.
Skandalin e Shkelqim Fushës në pagesat e hotelit të Nënkryetarit të Bashkisë Tiranë e zbuloi një faqe si JetaOshQef që pak ka të bëjë me gazetarinë, por që kishin guximin të nxirrin faturën dhe firmën e një oligarku.
Këto janë pak shembujt për të treguar sesa e turpshme është reagimi i “gazetarëve të mafias” siç do ti quante analisti Vehap Kola, që ndjehen të frustruar sepse PD i nxorri në dritë skemën e goditjes së opozitës dhe ftoi strukturat e saj të distancohen nga media që i shërbejnë pushtetit dhe oligarkëve kriminalë.
Me sponsorizimet e majme të oligarkëve “gazetarët e mafias” nuk pranojnë të etiketohen me emrin që meritojnë.
Asnjë nga gazetarët e përmendur me emër ose të nënkuptuar nuk u interesua të shikonte pamjet e kamerave të spitalit të Fierit, ku flitet për përfshirje të zyrtarëve me pushtet për të shkatërruar provat e lidhjes së dy bandave me klanin e Kryetarit të Kuvendit.
Asnjë mediat e madhe Kombëtare apo lokale nuk kërkoi asnjë informacion për dosjet 339/184 apo tentoi të zbulonte më shumë për ngjarjen e spitalit të Fierit, apo të hulumtonte qindra konçesione, PPP e tendera korruptivë që po i zënë frymën shqiptarëve.
“Gazetarët e Mafias” në shërbim të organizatës kriminale të Rilindjes janë të prekur nga 2 faqe word të Partisë Demokratike që ka vendosur të mos bëhet palë me të keqen, për ta luftojë atë me çdo mjet në dispozicion, duke sakrifikuar çdo komoditet që ofron heshtja./Faktor.al/