Filiali i një banke është grabitur mëngjesin e sotëm në Shtime. Lajmin e grabitjes e ka konfirmuar edhe policia.
Policia e Kosovës bën të ditur se rasti ka ndodhur rreth orës 08:15, ndërsa ende nuk dihet shuma e parave të grabitura.
“Sot rreh orës 08:15, në rrugën “Tahir Sinani” ka ndodhur një rast grabitje me armë kur në lokalet e bankës kanë hyrë katër persona të armatosur me armë të gjata dhe nën kërcënimin e armës nga punëtorja kanë kërkuar që t’i dorëzoj paratë nga arka,shuma nuk dihet për momentin.
Me këtë rast ka pasur edhe shkrepje arme në ajër nga ana e një të dyshuari por nuk ka persona të lënduar”, thuhet në njoftimin e policisë.
Kjo e fundit ka bërë të ditur se të dyshuarit janë larguar nga vendi i ngjarjes me një fugon.
Ndërkaq gjatë ndjekjes së të dyshuarve ka pasur gjuajtje me armë nga ana e tyre në drejim të policisë.
