Një 20 vjeçar shqiptar u arrestua nga policia italiane, me akuzën e dhunës ndaj gruas me të cilën bashkëjetonte.
Shqiptari i arrestuar është H.S, i cili akuzohet se torturonte gruan, 20-vjeçare, në sy të vajzës së mitur.
Burri e kishte qëlluar gruan me shkelma, me grushte dhe i kishte shkaktuar plagë nga kafshimet në kokë, të gjitha këto në sy të të miturës.
Ulërimat e gruas kanë tërhequr vëmendjen e fqinjëve, të cilët kanë telefonuar me urgjencë policinë.
Menjëherë një grup karabinierësh shkuan në banesë dhe e kapën shqiptarin në flagrancë. Ndërkohë që gruaja ishte e tmerruar dhe me shenja të dukshme të dhunës.
Ajo tregoi se situata të tilla ishin të përsëritura.
Gruaja dhe vajza e saj u transportuan në spital. Gruaja u mjekua për trauma dhe dëmtime të shumta në trup.
Ajo tha se burri e kishte izoluar në banesë, dhe shumë herë e detyronte të flinte në një dhomë tjetër, pa e lejuar të shihte të bijën.
