Nga Boldnews.al
Pak ditë më parë u publikua një faturë e Arbion Maznikut, nënkryetar i Bashkisë së Tiranës, të cilit kompania Fusha shpk i kishte paguar hotelin në Barcelonë, gjatë një aktiviteti të organizuar atje, ku sheshi Skënderbej në Tiranë, morri çmimin si hapësira më e mirë publike e urbane në Europë për vitin 2018.
Fatura e publikuar tregonte se Fusha shpk, më konkretisht Shkëlqim Fusha, i kishte paguar një natë hoteli 900 euro nënkryetarit të Bashkisë, ndonëse ligji parashikon ndalimin e dhuratave të tilla.
Bashkia e Tiranës në një sqarim për Zërin e Amerikës tha se të gjithë grupit që ka shkuar në Barcelonë për tërheqjen e çmimit të madh shpenzimet i ka mbuluar Fusha shpk, kompania që ndërtoi sheshin “Skënderbej”.
“Me rastin e marrjes së këtij Çmimi prestigjoz, një grup nga Shqipëria udhëtoi për në Barcelonë për të marrë pjesë në ceremoni dhe për të tërhequr çmimin. Kompania “Fusha” mori përsipër të mbulojë shpenzimet për grupin nga Shqipëria”, sqaroi Bashkia e Tiranës për VOA.
Por referuar publikimeve zyrtare nga ky institucion, pjesë e delegacionit të Bashkisë, ka qenë edhe Kryebashkiaku Erjon Veliaj.
Bashkia e Tiranës në njoftimin përkatës lidhur me aktivitetin e organizuar në Barcelonë shkruante “në 3 vjetorin e zgjedhjes në krye të Bashkisë së Tiranës, Erion Veliaj tërhoqi dje në Barcelonë çmimin e madh për Sheshin “Skënderbej”, i cili u përzgjodh nga një juri profesioniste ndërkombëtare, si hapësira më e mirë publike e urbane në Europë për vitin 2018, duke triumfuar mes 279 projekteve nga 32 vende në konkurrim”.
Kjo do të thotë se Veliaj ka qenë pjesë e delegacionit, për të mos thënë që ka kryesuar delegacionin, pasi ka tërhequr edhe çmimin, ku gjithashtu ishte i pranishëm edhe Mazniku.
Këtij të fundit i është paguar fatura e hotelit nga Fusha dhe nga ajo çka deklaron vetë Bashkia në reagimin e saj për Zërin e Amerikës, shpenzimet për delegacionin janë mbuluar nga kjo kompani.
Atëherë pyetja e parë që lind është në cilin hotel ka fjetur Veliaj dhe sa i është paguar nata nga kompania Fusha, përderisa për nënkryetarin Mazniku janë shpenzuar 900 euro?
Vështirë është që Veliaj të pohojë mbi faturën që i ka mbuluar kompania, e cila prej momentit që ai ka hyrë në Bashkinë e Tiranës, pothuajse po kryhen çdo punim në infrastrukturën e kryeqytetit, madje me çmime marramendëse.
Dhe po kështu është e njëjta kompani, për të cilën mazhorancës iu desh të bënte një ligj të veçantë, që t’i hapte dritën jeshile për të ndërtuar disa kulla në zonën e Teatrit Kombëtar, dhe në shkëmbim kompania në fjalë do të ndërtonte godinën e re të teatrit.
