Pas një pushimi në dukje të qetë, deputetët e Kuvendit të Shqipërisë do t’i rikthehen legjislaturës së 9-të. Hapja e sesionit të 5-të është njoftuar për në orën 18:00 të kësaj të hëne. Por ajo që duket është fakti se në këtë sesion nuk priten debate brenda sallës së madhe të Parlamentit, për aq kohë sa opozita e madhe nuk është e pranishme.
Në sallën e Kuvendit, opozita e bashkuar, është zëvendësuar me numra deputetësh të caktuar aty me vendim të KQZ, pas largimit të Partisë Demokratike dhe Lëvizjes Socialiste për Integrim.
Ajo që tashmë dihet se si do të vazhdojë është, Opozita e bashkuar jashtë sallës së Kuvendit, me deklarata dhe kërkesat e saj të vazhdueshme për largimin e Edi Ramës dhe zhvillimin e zgjedhjeve të ndershme dhe të lira në 13 tetor, datë e dekretuar nga Presidenti Ilir Meta para zgjedhjeve të 30 qershorit, dhe PS brenda sallës në përpjekje për të ruajtur pozitat e saj, të cilat dukshëm janë lëkundur.
Në seancë e kësaj të hëne është parashikuar të miratohet procesverbali i seancës plenare të 18 korrikut dhe njoftimi i projektligjeve të depozituara, miratimi i programit të punës deri në 18 shtator, miratimi i kalendarit 3 javor.
Nuk është parashikuar të bëhen diskutime.
Rendi
- Hapja e Sesionit të V – të të Legjislaturës së IX–të të Kuvendit të Shqipërisë
- Miratimi i procesverbalit të seancës plenare të datës 18.7.2019 (neni 44, pika 2 e Rregullores) 3. Njoftimi i projektligjeve të depozituara në Kuvend (neni 44, pika 3 e Rregullores)
- Njoftimi/Miratimi i Programit të Punës së Kuvendit për periudhën 2 shtator – 18 tetor 2019 (neni 26, pikat 5, 6 të Rregullores, votim me shumicë të thjeshtë)
- Njoftimi/Miratimi i Kalendarit 3-javor të punimeve të Kuvendit për periudhën 2 – 20 shtator 2019 (neni 27, pikat 3, 4 të Rregullores, votim me shumicë të thjeshtë)