Rifat Kojku dhe Belina Zeneli janë prokurorët që do të hetojnë dosjen 184, e cila u transferua pas 3 vitesh nga Prokuroria e Krimeve të Rënda drejt asaj të Dibrës.
Dosja 184 zbardh skemën e manipulimit të votave në qarkun e Dibrës dhe nga përgjimet e publikuara nga gazeta gjermane “Bild” shihet qartë implikimi i ministrave, deputetëve, drejtuesve të policisë, dhe atyre të institucioneve qendrore dhe lokale, në presionet që u bëhen zgjedhësve për të votuar kandidatin e Rilindjes për kryebashkiak, në zgjedhjet e pjesshme vendore.
Prokurorët janë caktuar nga drejtuesja e prokurorisë së Dibrës, e cila vetë është në konflikt interesi për dosjen 184, për shkak se një nga personat e përfshirë në përgjime, është i afërm i saj.
Transferimi i dosjes 184 nga Krimet e Rënda drejt Prokurorisë së Dibrës shkaktoi debate të forta, ndërsa u interpretua si një vendim i Kryeprokurores së Përkohshme për të mbyllur hetimet ndaj zyrtarëve më të lartë të Rilindjes dhe Qeverisë.
