Prova më e fortë e Prokurorisë, dhe që rrëzoi alibinë e protagonistëve të përfshirë në vrasjen e teknikut të kondicionerëve, Indrit Çelaj, ka qenë kamerat e sigurisë së një lokali pranë vendit të ngjarjes.
Grupi hetimor ka analizuar pamjet e tri kamerave të sigurisë, që kanë filmuar për afro një orë, nga ora 10:33 deri në orën 11:24, të gjitha veprimet e dyshimta të autorëve.
Nëpërmjet këtyre pamjeve është bërë i mundur identifikimi i vëllezërve Griseldo dhe Alban Kusi, të dyshuar si autorë të dyshuar të vrasjes së 26- vjeçarit, Indrit Çelaj.
Ndërsa është rrëzuar përfundimisht alibia e babait të tyre, Bujar Kusi, i cili pretendonte se djemtë e tij ndodheshin në plazh, te Gjiri i Lalzit me dy shoqe.
Kur kanë kaluar disa ditë nga ngjarja e rëndë, burimet thanë për Panorama, se dyshohet që vëllezerit në kërkim të kenë kaluar kufirin drejt Greqisë në mënyre ilegale.
Gazetarja e Panorama mëson se dy ditë pas krimit në zonën e Myslym Shyrit, në vilën 3 katëshe të familjes Kusi, ku viktima po montonte kondicionerë, ishte zbuluar se dy vëllezërit ndodheshin në zonën e Vorës.
Kjo ishte zbuluar përmes antenave telefonike, por mbetet ende e paqartë se si arritën të shpëtonin nga duart e policisë dy të rinjtë.
