Dy persona janë vënë në pranga nga Policia e Devollit, pasi po kalonin rroba kontrabandë, përtej kufirit, ndërkohë që një person tjetër është shpallur në kërkim.
Policia informon se të arrestuarit janë E.B, 25 vjeç dhe V.B, 44 vjeç, si edhe po punohet për kapjen e shtetasit D.B, 30 vjeç, të tre banues në fshatin Menkulas të Devollit.
“Policia e Devollit, në hyrje të fshatit Menkulas, kanë konstatuar shtetasit E.B. dhe V.B., të cilët kishin kaluar kufirin në mënyrë të paligjshme dhe po transportonin konfeksione të ndryshme (rroba) që i kishin futur kontrabandë”- njofton policia.
Nga veprimet e para hetimore të kryera, shtetasi D.B., i shpallur në kërkim, rezulton të jetë porositësi dhe pritësi i mallrave.
Mbi personat e arrestuar rëndojnë veprat penale “Kontrabanda me mallra të tjera, kryer në bashkëpunim” dhe “Kalimi i paligjshëm i kufirit shtetëror”.