Policia e Fierit arrestoi një tjetër person, të shpallur në kërkim prej ditës së djeshme, lidhur me konfliktin që shkaktoi 5 të plagosur të shtunën pasdite në këtë qytet.
Konflikti nisi mes dy familjeve në Levan, por u zhvendos edhe në mjediset e spitalit, atje ku një prej policëve të Patrullës së Përgjithshme, iu mor arma nga brezi dhe me të u qëllua Aleksandër Zhapa.
Ende nuk bëhet i ditur identiteti i personit të arrestuar sot, ndërsa mbrëmjen e djeshme, u shoqëruan në komisariat dy persona, shtetasit E.Braçe. e D.Braçe.
Policia ka sqarur se gjithsej në këtë sherr u plagosën 5 persona, dy me sende të forta, dy me mjete prerës, ndërsa njëri me armë zjarri.
Gentian Zhapa dhe Aldi Zhapa janë plagosur me sende të forta dhe janë në pavionin e kirurgjisë. Ndërsa dy të plagosurit e tjerë të plagosur me thika apo mjete prerëse janë Klajdi Lamaj dhe Erlind Muçaj.
Po ashtu nga ky konflikt ka mbetur i plagosur edhe Aleksandër Zhapa (babai i Gentian Zhapës). Aleksandër Zhapa u plagos në ambientet e brendshme të spitalit Rajonal të Fierit.
