Të tjera detaje janë zbardhur nga ngjarja e ndodhur pasditen e djeshme në Fier, ku u plagosën 5 persona, ndërsa konflikti i nisur në Levan u zhvendos në spitalin rajonal, ku pati edhe të shtëna me armë.
Sipas BW, të plagosur kanë mbetur shtetasit Aleksandër Zhapaj, Aldi Zhapaj dhe Gentjan Zhapaj (djem të Aleksandrit), të cilët ndodhen të shtruar në pavionin e spitalit.
Ndërkohë, dy të plagosurit e tjerë, Klajdi Jonuz Lamaj dhe Erlind Afrim Muçaj ndodhen në reanimacion. Policia ka blinduar spitalin prej mbrëmjes së kaluar.
Dy prej të plagosurve, Klajdi Lamaj dhe Erlind Muçaj, ndodhen në reanimacion për shkak të gjendjes së rënduar shëndetësore.
Mësohet se forca të shumta policore kanë ruajtur ambientet e spitalit gjatë gjithë natës.
Konflikti ndodhi mes familjeve Zhapa dhe Braçe në fshatin Levan.
Si rrodhi ngjarja
Të plagosurit janë transportuar për në Spital, për ndihmë mjekësore. Në Urgjencën e spitalit një prej shoqërueseve të të dëmtuarve i ka marrë armën e zjarrit nga brezi punonjësit të policisë, i cili po ndihmonte për të futur të plagosurit në Urgjencë dhe ka plagosur me armë zjarri një prej familjarëve të palës tjetër, shtetasin A.ZH”.
Gentian Zhapa 33 vjec, është personi i plagosur me levë që ishte nisur në spitalin e Fierit për të marrë ndihmë pas sherrit ku ishte përfshire në Levan. Ndërsa për ta shoqëruar në spital kishte shkuar edhe babai i tij, i cili ka mbetur i plagosur me armën e policit të patrullës, që autori ia ka marrë nga brezi.
Në ndihmë të punonjësve të Policisë kanë shkuar menjëherë forca të shumta policie duke kanë bërë bllokimin e dy shtetasve E.B. e D.B. dhe shoqërimin në ambientet e Drejtorisë Vendore të Policisë për veprime të mëtejshme.
Për hetimin e kësaj ngjarje Drejtori i Përgjithshëm i Policisë së Shtetit ka ngritur një grup të posaçëm hetimor me Specialistë të Hetimit të Krimeve të Rënda në Departamentin e Policisë Kriminale.
Njëkohësisht me urdhër të Drejtorit të Përgjithshëm të Policisë së Shtetit në vendngjarje kanë shkuar edhe specialistët e Drejtorisë së Standarteve Profesionale në Polici, për të verifikuar veprimet e punonjësve që ishin në momentet e para në Urgjencën e spitalit.
Nën drejtimin e Prokurorisë së Rrethit Gjyqësor Fier po vijon puna për zbardhjen e plotë të rrethanave të ngjarjes, motivit të konfliktit si dhe vënien para përgjegjësisë ligjore të personave përgjegjës.