Votimet e 30 qershorit nuk sollën vetëm kryetar të paligjshëm në bashki, por kanë prodhuar dhe çudira të paimagjinueshme në administratë.
Gafa e radhës vjen nga Berati. Pas marrjes së mandatit, Ervin Demo, i cili u shkarkua si zv/ministër për plagjaturë, ka nisur zgjedhjen e administratorëve të njësive vendore (ish-komunave).
Ligji parashikon që administratori zgjidhet dhe shkarkohet nga kryetari dhe nuk kalon në ndonjë filtër votimi. Pak a shumë është njëlloj si një administrator “pallati”. Për pasojë dhe marrja e detyrës është thjesht formale, si një i emëruar. Por në Berat, administratorët e nisin punën me ceremoni zyrtare. Madje, me ceremoni edhe më serioze se ajo e kryetarit të bashkisë
Në fotot më poshtë është momenti i “betimit” të administratorit të Njësisë Roshnik, Eglison Qose. Arjan Shkëmbi, nënkryetari i Bashkisë ka organizuar ceremoninë duke i vendosur dhe shiritin e kryetarit të bashkisë!!! Si rregull shirit është shenjë dalluese e të zgjedhurit të qytetarëve për pushtetin vendor. Por në Berat, gjithë nëpunësit e bashkisë tashmë e marrin detyrën me ceremoni shtetërore dhe madje bëjnë dhe foto zyrtare.
Vetë kryetari Demo nuk ka qenë në ceremoni, pasi siç thanë në Bashki, rri gjithë ditën vërdallë që të mos lejojë mbarështimin e kafshëve në këtë qytet.
Me këtë ceremoni nuk është çudi që administratori i Roshnikut, pasi i ka vjedhur shiritin Ervin Demos, ti vjedhë edhe zyrën e mandatin. Kjo nuk do ishte ndonjë shkelje e madhe, pasi edhe Demo kështu e mori detyrën, pa zgjedhje normale dhe pa vota.
Neni 63 i ligjit “Për Pushtetin Vendor” për shiritin e kryebashkiakut
“Simboli i kryetarit të bashkisë
- Simboli dallues i kryetarit të bashkisë është një shirit me ngjyrat e flamurit kombëtar, me gjerësi 111 mm, i ndarë në tre sektorë me gjerësi të njëjtë, i kuq – i zi- i kuq.
- Simboli dallues vendoset krahaqafë, nga supi i djathtë në ijen e majtë.
- Kryetari e mban detyrimisht këtë shirit në mbledhjet solemne, pritjet zyrtare, ceremonitë publike dhe në ceremonitë e lidhjes së martesave”.
/Koha Jonë/
