Gazetari Ylli Rakipi ka folur rreth një darke që kryeministri Edi Rama ka zhvilluar me pronarin e TV Klan, Aleksandër Frangajn dhe Blendi Fevziun, në një restorant luksoz në kryeqytet më 8 prill 2019.
Rakipi u shpreh se kryeministri Edi Rama i ka bërë presion drejtuesit të emisionit “Opinion”, duke i kërkuar që të mos ftojë në studio përfaqësuesë të opozitës së re parlamentare, pasi dëmtojnë reputacionin e mazhorancës.
“I ka bërë presion edhe kolegut tonë, Blendi Fevziut. I ka kërkuar të mos ftojë më në studio përfaqësuesë të opozitës së re”, deklaroi Rakipi në studion e lajmeve të Ora News.
“E keni pare se cfare niveli kanë ata. Qeshin me cdo batute te Edi Ramës. Ai i kotrollon, u tregon si duhet të votojnë”, shtoi ai.
Gazetari shtoi se Edi Rama po bën përpjekje për të kapur edhe median onine, duke u ofruar reklama dhe para.
“Ideja për ta çuar tek pronarët, është vepër e propagandës së Ramës, sikur ky është një problem pronarësh. Në Shqipëri, media është marrë përgjithësisht nga qeveria. Paralel me ekzekutimin për emisionin tim dhe të Krastës është vënë në pozitë të vështirë në një darkë edhe një nga kolegët e mi të njohur Blendi Fevziu. Me insistim i është kërkuar që opozitën e rrugës që është tani të mos shfaqet. Ne kemi filluar të pajtohemi me këtë mënyrë. Jetojmë në një komunitet që sheh punët e veta”, tha Rakipi.
